भुसावळातील हुंडाबळी प्रकरणात सबळ पुराव्या अभावी पतीची खंडपीठाकडून निर्दोष मुक्तता
भुसावळ (29 नोव्हेंबर 2025) : भुसावळ शहरातील कल्पना उर्फ नलिनी मधुकर निंभोरे आत्महत्या प्रकरणात पती मधुकर श्रीराम निंभोरे यांना न्यायालयाने तीन वर्षाची शिक्षा सुनावली होती. त्या शिक्षेविरूध्द निंभोरे यांनी मुंबई उच्च न्यायालयाच्या औरंगाबाद खंडपीठात अपील केले होते. यात खंडपीडाने निंभोरे यांना निर्दोष मुक्त करण्याचे आदेश दिले. 21 नोव्हेंबर 2025 रोजी ही अंतिम सुनावणी झाली.
आठ जणांविरोधात दाखल होता गुन्हा
सन 2001 मध्ये फिर्यादी खंडेराव आरके यांनी तक्रार देत त्यांच्या मुलीला हुंड्याच्या मागणीसाठी छळ करण्यात आल्याचा आरोप केला होता. या प्रकरणात पतीसह कुटुंबातील आठ जणांवर गुन्हा दाखल झाला होता. अतिरीक्त जिल्हा सत्र न्यायालयात सुनावणीत सर्व संशयीतांना मुक्त केले होते मात्र पती मधुकर निंभोरे यांना तीन वर्षांची शिक्षा ठोठावली होती. या शिक्षेविरुद्ध त्यांनी 2004 मध्ये खंडपीठात अपिल दाखल केले होते.
अंतिम सुनावणीत बचाव पक्षाचे वकील प्रसन्ना एन.कुट्टी यांनी सादर केलेल्या युक्तिवादात महत्त्वाच्या साक्षीदारांची साक्ष न घेणे, पोस्टमार्टम अधिकार्यांना साक्षेस न बोलावणे, तसेच हितसंबंधी साक्षीदारांवर अवलंबून राहणे यांसारख्या प्रक्रियात्मक त्रृटींकडे न्यायालयाचे लक्ष वेधले. सबळ पुरावे नसताना पतीवर शिक्षा कायम ठेवणे योग्य नसल्याचे त्यांनी सांगितले. खंडपीठाने सर्वोच्च न्यायालयाच्या संबंधित निकालांचा संदर्भ घेत बचाव पक्षाचा युक्तिवाद मान्य केला. आत्महत्येला प्रवृत्त केल्याचे ठोस पुरावे सरकार पक्ष सादर करू न शकल्याने मधुकर निंभोरे यांना निर्दोष मुक्त केले.
