प्रामाणिक अधिकार्‍याला किती छळणार ? तुकाराम मुंढेनी सोडले मौन

माझ्यावर वारंवार जुनेच आरोप
तुकाराम मुंढे म्हणाले, मला नागपूरच्या माझ्या कार्यकाळात काम करू दिले नाही. काहींनी अनेक अडथळे आणले. खोटे आरोप करून विविध चौकश्या माझ्या मागे लावल्या. चौकशीत मी निर्दोष आढळलो. तरी माझ्यावर तेच आरोप वारंवार करण्यात आले.

कामासाठी एका नेत्याचा दबाव
महापालिकेत अनेक वर्षांपासून बेकायदेशीररीत्या नोकरी करत असलेल्या 17 कर्मचार्‍यांच्या 2001 पासूनच्या प्रलंबित वेतनाच्या फाईलवर स्वाक्षरी करण्यासाठी एका नेत्याने माझ्यावर प्रचंड दबाव आणला होता मात्र हे प्रकरण संशयास्पद वाटल्याने मी सही करण्याऐवजी त्याची खात्यांतर्गत चौकशी लावली.

आमदाराच्या नातेवाईकावर कारवाई केल्यानेच कट
शासनाच्या नियमाप्रमाणे केलेल्या या चौकशीत या 17 जणांची नोकरी बेकायदेशीर असल्याचे सिद्ध झाले आणि मी त्यांना बडतर्फ केले. विशेष म्हणजे यात एका स्थानिक आमदाराच्या जवळच्या नातेवाईकाचाही समावेश होता त्यामुळेच त्या आमदाराचा ईगो दुखावला गेला आणि त्यांनी माझ्याविरोधात मोहीम उघडली, असे तुकाराम मुंढे यांनी एका वृत्तवाहिनीशी बोलताना सांगितले.

महिलांना पुढे करून बदनामीचा कट
तुकाराम मुंढे पुढे म्हणाले, मी दबावाला बळी पडलो नाही, म्हणून काही महिलांना हाताशी धरून माझ्यावर खोटे आरोप लावण्यात आले. ज्या प्रकरणांमध्ये मला आधीच ‘क्लीन चिट’ मिळाली आहे, तीच जुनी प्रकरणे उकरून काढून मला त्रास दिला जात आहे. नागपुरात काम करताना मी कोणाचीही मनमानी चालू दिली नाही, याचीच ही शिक्षा मला दिली जात आहे. एका प्रामाणिक अधिकार्‍याला नक्की किती त्रास द्यायचा, याला काही मर्यादा आहेत की नाही? असा उद्विग्न सवालही त्यांनी उपस्थित केला.