राज्यातील पहिलीच कारवाई : धुळ्यातील व्यापार्‍याची 65 लाखात फसवणूक करणार्‍या आरोपीची 29 लाखांची मालमत्ता जप्त

First action in the state : Property worth Rs 29 lakh seized of accused who cheated Dhule businessman of Rs 65 lakh धुळे (25 फेब्रुवारी 2026) : धुळ्यातील 51 वर्षीय व्यापार्‍याची कामाला ठेवलेल्या संशयीताने 65 लाखात फसवणूक केली होती. या प्रकरणी मोहाडी पोलिसात गुन्हा दाखल करण्यात आला होता मात्र संशयीत गुन्हा दाखल होताच पसार झाला होता. पोलिसांनी या प्रकरणात प्रथमच बीएनएस कायद्यातील तरतुदीचा आधार घेत संशयीताची तब्बल 28 लाख 66 हजारांची मालमत्ता न्यायालयाचा निकाल लागेपर्यंत जप्तीचे आदेश मिळवले आहेत. नवीन बीएनएस कायद्याचा 107 नुसार गुन्ह्यातील आरोपीची मालमत्ता शोधून ती जप्त करण्याचे अधिकार पोलिसांना मिळाले आहेत. राज्यात एखाद्या आरोपीच्या मालमत्तेवर कारवाई करण्याची राज्यातील ही पहिलीच व दुर्मीळ कारवाई असल्याचे सूत्रांनी सांगितले.

अशी झाली फसवणूक
धुळ्यातील उद्योजक शंकर मूलचंद शेतिया (जवाहर नगर, साक्री रोड, धुळे) यांचा अ‍ॅल्युमिनिअम सेक्शन विक्रीचा व्यवसाय आहे. त्यांनी व्यवसाय चालवण्यासाठी संशयीत पंचानन उर्फ रणजित सुरत राणा (सुनावल, बदम्बा, जि.कटक, ओडिशा, ह.मु.साईकृपा नगर, तिखी रोड, अवधान, धुळे) याला कामावर ठेवले होते. शेतीया हे कंपनीत येत नसल्याने आरोपीने त्यांचा विश्वास संपादन करीत काही काळ व्यवहाराचा हिशोब बरोबर दिला मात्र ऑगस्ट 2020 पासून ते 24 सप्टेंबर 2025 दरम्यान आरोपीने उद्योजकाचा विश्वासघात करीत रणजितने कंपनीत येणारा माल परस्पर विक्री करून 65 लाखांचा अपहार केला. या रकमेतून आरोपीने धुळ्यात मालमत्ता खरेदी केली होती. उद्योजकाने या प्रकरणी मोहाडी पोलिसात 9 डिसेंबर 2025 रोजी गुन्हा दाखल करण्यात आला.