Missing woman’s body found on farm embankment शहादा (7 मार्च 2026) : शहादा तालुक्यातील कहाटुळ गावातील 21 दिवसांपासून बेपत्ता असलेल्या एका महिलेचा मृतदेह तिच्याच शेताच्या बांधावर आढळून आल्याने परिसरात मोठी खळबळ उडाली आहे. या महिलेच्या मृत्यूचे नेमके कारण शवविच्छेदन अहवालाअंती समोर येणार आहे.
काय आहे प्रकरण ?
कहाटुळ येथील ही महिला मागील 21 दिवसांपासून अचानक बेपत्ता झाली होती. कुटुंबीयांनी सुरुवातीला तिचा सर्वत्र शोध घेतला, मात्र ती कुठेच सापडली नाही. अखेर त्यांनी शहादा पोलीस ठाण्यात बेपत्ता असल्याची तक्रार दाखल केली होती. त्यानंतर पोलीस आणि कुटुंबीयांकडून तिचा शोध सुरू होता.
दरम्यान, गावाजवळील शेताच्या बांधावर एका महिलेचा मृतदेह आढळून आला. तपास केल्यानंतर हा मृतदेह 21 दिवसांपासून बेपत्ता असलेल्या त्या महिलेचाच असल्याचे स्पष्ट झाले. ही माहिती समोर येताच कुटुंबीयांसह गावकर्यांना मोठा धक्का बसला. महिलेचा मृतदेह ज्या परिस्थितीत आढळून आला, त्यावरून तिचा घातपात झाल्याचा संशय आहे. या घटनेची माहिती मिळताच गावातील नागरिक आणि नातेवाईक मोठ्या संख्येने घटनास्थळी जमा झाले. संतप्त ग्रामस्थांनी या प्रकरणाचा सखोल तपास करून दोषींना तत्काळ अटक करावी आणि कठोर कारवाई करावी, अशी मागणी केली आहे. दरम्यान, घटनेची माहिती मिळताच शहादा पोलिसांनी घटनास्थळी धाव घेतली. पोलिसांनी मृतदेहाचा पंचनामा करून तो पोस्टमार्टेमसाठी शासकीय रुग्णालयात पाठवला आहे. शवविच्छेदन अहवालानंतरच मृत्यूचे नेमके कारण स्पष्ट होणार असल्याचे पोलिसांनी सांगितले आहे.
