भुसावळ तालुक्यातील खेडी येथे उद्या वीर शिरोमणी महाराणा प्रताप जन्मोत्सव सोहळा

The birth anniversary celebration of Veer Shiromani Maharana Pratap will be held tomorrow at Khedi in Bhusawal Taluka. भुसावळ (16 मे 2026) : अखंड भारताचे स्वाभिमान, अजेय योद्धा आणि शौर्याचे प्रतीक क्रांतीसूर्य वीर शिरोमणी महाराणा प्रताप यांच्या जन्मोत्सवानिमित्त भुसावळ तालुक्यातील खेडी बु.॥येथे भव्य- दिव्य सोहळ्याचे आयोजन करण्यात आले आहे. या कार्यक्रमाला प्रमुख पाहुणे म्हणून महाराष्ट्र राज्याचे वस्त्रोद्योग मंत्री तथा भुसावळचे आमदार संजय सावकारे उपस्थित राहणार आहेत.

मिरवणूक आणि महाआरतीचे आयोजन
हा जन्मोत्सव सोहळा रविवार, 17 मे रोजी खेडी बु.॥ येथे सायंकाळी साजरा केला जाईल. सायंकाळी सहा वाजता हनुमान मंदिरापासून टाळ-मृदंगाच्या गजरात आणि जयघोषात वीर शिरोमणी महाराणा प्रताप यांच्या भव्य दिव्य पालखी मिरवणुकीला सुरुवात होईल. या मिरवणुकीची सांगता विठ्ठल मंदिरात होईल. सायंकाळी सात वाजता विठ्ठल मंदिरात मंत्री संजय सावकारे यांच्या हस्ते महाराणा प्रतापजी यांची महाआरती करण्यात येईल.

ग्रामस्थांचे उपस्थितीचे आवाहन
या ऐतिहासिक आणि मंगलमय सोहळ्याचे साक्षीदार होण्यासाठी चोरवड आणि खेडी बु.॥ येथील समस्त ग्रामस्थांनी व निमंत्रकांनी परिसरातील नागरिकांना आवाहन केले आहे. या कार्यक्रमाला सर्व नागरिकांनी सहकुटुंब, सहपरिवार आणि विशेषतः गावातील महिलांनी मोठ्या संख्येने उपस्थिती द्यावी, असे आवाहन संयोजकांतर्फे करण्यात आले आहे.