जबलपूर-पुणे विशेष रेल्वे आता नियमित एक्सप्रेस ; प्रवाशांना मिळणार कायमस्वरूपी सुविधा
24 मेपासून नव्या क्रमांकांसह साप्ताहिक सेवा सुरू ; भुसावळ, मनमाडसह महत्त्वाच्या स्थानकांवर थांबा
Jabalpur-Pune Special Train Now a Regular Express; Passengers to Receive Permanent Facility भुसावळ (22 मे 2026) : रेल्वे प्रशासनाने जबलपूर-पुणे दरम्यान धावणार्या विशेष रेल्वेगाडीचे नियमित रेल्वे सेवेत रूपांतर करण्याचा महत्त्वपूर्ण निर्णय घेतला आहे. यामुळे या मार्गावरील प्रवाशांना अधिक नियमित, विश्वासार्ह आणि सोयीस्कर रेल्वे सेवा उपलब्ध होणार आहे. सध्या विशेष गाडी म्हणून धावणारी गाडी क्रमांक 02132/02131 आता नव्या क्रमांकांसह नियमित साप्ताहिक एक्सप्रेस म्हणून चालविण्यात येणार आहे.
रेल्वेच्या माहितीनुसार, गाडी क्रमांक 20162 जबलपूर-पुणे साप्ताहिक एक्सप्रेस ही 24 मे 2026 पासून प्रत्येक रविवारी जबलपूर येथून सुटेल. तर गाडी क्रमांक 20161 पुणे-जबलपूर साप्ताहिक एक्सप्रेस ही 25 मे 2026 पासून प्रत्येक सोमवारी पुणे येथून प्रस्थान करेल.
प्रवासाचे वेळापत्रक
गाडी क्रमांक 20162 (जबलपूर-पुणे साप्ताहिक एक्सप्रेस)
प्रत्येक रविवारी जबलपूर येथून दुपारी 1.50 वाजता सुटेल.
दुसर्या दिवशी सकाळी 6.25 वाजता पुणे येथे पोहोचेल.
गाडी क्रमांक 20161 (पुणे-जबलपूर साप्ताहिक एक्सप्रेस)
प्रत्येक सोमवारी पुणे येथून सकाळी 11.20 वाजता सुटेल.
दुसर्या दिवशी सकाळी 6.00 वाजता जबलपूर येथे पोहोचेल.
या स्थानकांवर थांबा
या एक्सप्रेसला मदन महल, नरसिंगपूर, पिपरिया, इटारसी, हरदा, बुरहानपूर, भुसावळ, मनमाड, कोपरगाव, बेलापूर, अहिल्यानगर आणि दौंड कॉर्ड लाईन या महत्त्वाच्या स्थानकांवर थांबा देण्यात आला आहे. त्यामुळे मध्य प्रदेश, खानदेश आणि पश्चिम महाराष्ट्रातील प्रवाशांना मोठा लाभ होणार आहे.
डब्यांची रचना
या गाडीत एकूण 17 डबे असतील. त्यामध्ये –
2 वातानुकूलित द्वितीय श्रेणी (-उ-2 ढळशी)
3 वातानुकूलित तृतीय श्रेणी (-उ-3 ढळशी)
6 शयनयान (डश्रशशशिी)
4 सामान्य द्वितीय श्रेणी
2 सामान व गार्ड ब्रेक व्हॅन
तिकीट आरक्षण सुरू
या नियमित एक्सप्रेस गाड्यांसाठी तिकीट आरक्षणाची सुविधा उपलब्ध करण्यात आली असून प्रवासी रेल्वेच्या अधिकृत संकेतस्थळावर तसेच मोबाईल अॅपद्वारे तिकीट आरक्षित करू शकतात. गाडीच्या थांब्यांवरील सविस्तर वेळापत्रक आणि इतर माहिती रेल्वेच्या अधिकृत माध्यमांवर उपलब्ध आहे.
विशेष गाडीचे नियमित सेवेत रूपांतर झाल्याने जबलपूर-पुणे मार्गावरील प्रवाशांच्या प्रवासाला अधिक स्थैर्य मिळणार असून, रेल्वे प्रवासाचा पर्याय अधिक सोयीस्कर ठरणार आहे.
