भुसावळात तापी कॉलनी भागात रेल्वेची मोठी कारवाई : रेल्वे जमिनीवरील अतिक्रमणावर फिरवला ‘बुलडोझर’

Major Railway Operation in Bhusawa l: ‘Bulldozer’ Action Against Encroachments on Railway Land along the 40-Foot Road in the Tapi Colony Area. भुसावळ (23 मे 2026) : भुसावळ विभागातील रेल्वे प्रशासनाने रेल्वे जमिनीवरील अतिक्रमणाविरोधात एक मोठी आणि धडक मोहीम हाती घेतली आहे. शहरातील तापी कॉलनी भागातील 40 फूट रोड आणि रेल्वेच्या मोकळ्या जमिनीवर करण्यात आलेले अनधिकृत अतिक्रमण रेल्वे प्रशासनाने रेल्वे सुरक्षा बलाच्या कडक बंदोबस्तात यशस्वीरित्या हटवले. अत्यंत संवेदनशील मानल्या जाणार्‍या या परिसरात रेल्वेच्या या आक्रमक पवित्र्यामुळे अतिक्रमणधारकांचे धाबे दणाणले होते मात्र कडेकोट बंदोबस्तामुळे ही कारवाई 15 ते 20 मेपर्यत कोणताही अनुचित प्रकार न घडता पूर्णपणे शांततेत पार पडली.

मोठी बांधकामे जमीनदोस्त
रेल्वे प्रशासनाने केलेल्या पाहणीत असे समोर आले होते की, या परिसरातील मुख्य कायमस्वरूपी इमारती जरी रेल्वेच्या हद्दीबाहेर असल्या,तरी काही व्यावसायिक आणि अतिक्रमणकर्त्यांनी रेल्वेच्या मालकीच्या जागेवर बेकायदेशीरपणे ताबा मिळवला होता.या जागेवर तात्पुरत्या स्वरूपाची बांधकामे, मोठी शेड्स आणि कंपाउंड वॉल (सीमा
भिंती) उभारण्यात आल्या होत्या.