भुसावळ : रेल्वे प्रवासात मोबाईल चोरी झाल्यानंतर लोहमार्ग पोलिसात गुन्हा दाखल करण्यात आला होता. पोलिसांनी आरोपीला अटक केल्यानंतर त्याच्या ताब्यातून मोबाईल जप्त केला व 14 रोजी न्यायालयाच्या आदेशाने तो तक्रारदाराला परत करण्यात आला. झाले असे की, तक्रारदार अतुल बठेजा (आदर्श कॉलनी, सिंधी कॉलनी, भुसावळ) हे अहमदाबाद-यशवंतपूर एक्स्प्रेसच्या कोच चार व बर्थ क्रमांक 56 वरून प्रवास करीत असताना चोरट्याने 30 हजार रुपये किंमतीचा मोबाईल लांबवला होता. या प्रकरणी गुन्हा दाखल करण्यात आल्यानंतर पोलिस निरीक्षक दिनकर डंबाळे यांच्या मार्गदर्शनाखाली हवालदार नितीन पाटील व जगदीश ठाकूर यांनी आरोपी विनोद मोरेश्वर एडकी (खालचे गाव, ब्रह्मटेक, शिरपूर) यास अटक केली. आरोपीच्या ताब्यातून जप्त करण्यात आलेला मोबाईल 14 रोजी न्यायालयाच्या आदेशाने तक्रारदाराला परत करण्यात आला.
