श्रीराम मंदिर निर्माण निधी संकलन अध्यक्षपदी महामंडलेश्वर जनार्दन हरीजी महाराज

फैजपूर : अयोध्येत निर्माण होत असलेल्या श्रीराम मंदिरासाठी भारत भूमीतील सर्व जाती-धर्माच्या प्रत्येक नागरीकाचा तन-मन-धनाने सहभाग असावा व या मंदिरासाठी माझे ही योगदान आहे, अशी प्रत्येकाच्या मनात आंतरिक भावना उत्पन्न व्हावी या प्रमुख उद्देशाने श्रीराम तीर्थक्षेत्र अयोध्या यांनी देशात विभागवार समित्या स्थापन केलेल्या आहेत. त्या अनुषंगाने देवगिरी प्रांत भुसावल जिल्ह्याचे मुख्य कार्यालय, भुसावळ येथे स्थापन करण्यात येऊन त्याचे नुकतेच उद्घाटन करण्यात आले. या उद्घाटन प्रसंगी झालेल्या बैठकीत समिती गठित करून सर्वानुमते परमपूज्य महामंडलेश्‍वर जनार्दन हरीजी महाराज यांची देवगिरी प्रांत भुसावळ जिल्हाध्यक्षपदी निवड करण्यात आली.

15 जानेवारीपासून निधी संकलनाला सुरूवात
या बैठकीत जिल्ह्यात तालुकानिहाय कार्यालय व स्थानिक समित्या स्थापन करण्यात येणार आहे. 15 जानेवारी 2021 पासून श्री राम मंदिरासाठी प्रत्यक्ष निधी संकलनाला सुरुवात करण्यात येणार असून 15 फेब्रुवारी 2021 पर्यंत संकलन केले जाणार आहे. देणगीदारांना संस्थेची अधिकृत जमा पावती दिली जाणार असल्याचे महामंडलेश्‍वर जनार्दन हरीजी महाराज यांनी सांगितले. या ऐतिहासिक कार्यात सहभागी होऊन प्रत्येकाने आपला खारीचा वाटा उचलावा, असे आवाहन समितीतर्फे करण्यात आले आहे.