ग्रामपंचायत निवडणूक : एकही अर्ज दाखल नाही

भुसावळ 26, रावेर 48, यावल 40, मुक्ताईनगर 51 तर बोदवड तालुक्यातील 29 ग्रामपंचायतीसाठी निवडणूक

भुसावळ : ग्रामपंचायत निवडणुकीचा बिगुल वाजल्यानंतर प्रत्यक्षात निवडणूक प्रक्रियेला सुरुवात झाली मात्र पहिल्या दिवशी भुसावळ विभागात एकही अर्ज दाखल झाला नसल्याचे सूत्रांनी सांगितले. भुसावळ तालुक्यात 26, रावेर तालुक्यात 48, यावल तालुक्यात 40, मुक्ताईनगर 51, बोदवड 29 ग्रामपंचायतीसाठी निवडणूक होत आहे. निवडणुकीच्या अनुषंगाने इच्छूकांनी मोर्चेबांधणी केली असून ऐन हिवाळ्यात राजकीय आखाडा मात्र तापला आहे. दरम्यान, शुक्रवारपासून तीन दिवस उमेदवारी अर्ज दाखल करण्याच्या प्रक्रियेला सुटी राहणार आहे. 25 डिसेंबरला ख्रिसमसची सुटी, शनिवारी चौथा शनिवार आणि रविवारी सुटी असल्याने तीन दिवस उमेदवारी अर्ज दाखल करता येणार नाही.

रावेर : 253 जागांवर महिलांना संधी
रावेर : रावेर तालुक्यात पहिल्या दिवशी एकही अर्ज दाखल झाला नसल्याचे सूत्रांनी सांगितले. बुधवारपासून तालुक्यातील एकूण 48 ग्रामपंचायतीच्या निवडणूक प्रक्रियेला प्रत्यक्षात सुरुवात झाली. 167 प्रभागातील 452 जागांसाठी नामनिर्देशन पत्रे भरण्यास सुरूवात झाली असून एकूण जागांपैकी 253 जागा महिलांसाठी आरक्षित आहेत. एप्रिल ते डिसेंबर 20 या काळात तालुक्यातील 48 ग्रामपंचायतीची मुदत संपली मात्र कोरोना प्रादुर्भावामुळे ही निवडणूक काही काळ पुढे ढकलण्यात आली. आता 15 जानेवारीला होत असलेल्या या निवडणुकीसाठी बुधवार, 23 पासून नामनिर्देशन पत्र भरण्याची प्रक्रियेला सुरूवात झाली. तालुक्यातील निंभोरा बुद्रुक, विवरा बुद्रुक, खानापूर, तांदलवाडी, रसलपूर, केर्‍हाळा बुद्रुक या मोठ्या ग्रामपंचायतींसह एकूण
48 ग्रामपंचायतीसाठी निवडणूक होत आहे. धामोडी, मोरगाव खुर्द, तांदलवाडी, निंभोरा बुद्रुक, विवरा बुद्रुक , रसलपूर, केर्‍हाळा बुद्रुक, निंबोल येथील ग्रामपंचायतीची निवडणूक राजकीयदृष्ट्या महत्वपूर्ण ठरणार आहे.