भुसावळ लेडीज इक्वॅलिटी रन स्पर्धा तूर्त स्थगित

कोरोना रुग्णांच्या वाढत्या संख्येच्या पार्श्‍वभूमीवर भुसावळ स्पोर्टस अ‍ॅण्ड रनर्स असोसिएशनचा निर्णय

भुसावळ  : जागतिक महिला दिनानिमित्त भुसावळ स्पोर्टस अ‍ॅण्ड रनर्स असोसिएशन आयोजित ‘लेडीज इक्वँलिटी रन 2021’ चे आयोजन कोरोना आजाराच्या वाढत्या रुग्णसंख्येमुळे काही दिवसांसाठी स्थगित करण्यात आली आहे. 7 मार्च रोजी ही स्पर्धा प्रस्तावित होती. त्या संदर्भातील तयारीदेखील अंतिम टप्प्यात होती परंतु अचानक भुसावळ शहरात 20 फेब्रुवारीपासून कोरोना रुग्णांची संख्या वाढत असून सुरुवातीस दर मंगळवार, गुरुवार व रविवारी होणारे प्रशिक्षण कार्यक्रम बंद करण्यात आले. वाढती रुग्ण संख्या कायम असल्याने प्रशासनाच्या आवाहनाला सकारात्मक प्रतिसाद देत ही स्पर्धा काही दिवसांसाठी पुढे ढकलण्यात आली आहे. बुधवारी या संदर्भात भुसावळ स्पोर्ट्स अ‍ॅण्ड रनर्स असोसिएशनच्या पदाधिकार्‍यांची बैठक होवून त्यात हा निर्णय घेण्यात आला.

प्रशासनाच्या परवानगीनंतर होणार स्पर्धा
कोरोना रुग्णसंख्या कमी झाल्यानंतर व परीस्थिती सामान्य झाल्यानंतर प्रशासनाची परवानगी घेऊन ही स्पर्धा मोठ्या उत्साहात आयोजित करण्यात येईल, अशी माहिती संयोजिकाद्वय डॉ.नीलिमा नेहेते व डॉ.चारुलता पाटील यांनी दिली. सहभागी महिला स्पर्धकांनी दरम्यानच्या काळात धावण्याचा एकाकी सराव सुरू ठेवावा व नियमित वॉर्मअप व स्ट्रेचिंग व्यायाम प्रकार घरी करावा, असे आवाहन प्रवीण फालक यांनी केले आहे.