भुसावळ पोलिस दल सतर्कतेत पास

रेल्वे स्थानकावर मॉकड्रिल : पोलिस दलाची सज्जतेची केली तपासणी

भुसावळ : भुसावळ रेल्वे स्थानकावर बेवारस बॅगमध्ये बॉम्ब सदृष्य वस्तू तसेच आतकंवाद्यांनी नागरीकांनी ओलीस ठेवण्याची माहिती बाजारपेठ व शहर पोलिसांनी नियंत्रण कक्षाला दिली. यानंतर घटनास्थळी तगडा पोलिस ताफा पोहोचला. ओलीस धरुन ठेवलेल्या नागरीकांची सुटका, आतंकवाद्यांना अटक व बॉम्बसदृष्य वस्तूचा शोध असे पोलिसांची मॉकड्रिल शनिवारी सकाळी घेण्यात आले. यातून भुसावळ पोलिसांचे प्रसंगावधान व सुसज्जता तपासण्यात आली. सुरक्षा व्यवस्था तसेच अनुचित प्रकार घडल्यास पोलिस दल सज्ज आहे किंवा नाही? यादृष्टीने अचानक चाचपणीसाठी पोलीस अधीक्षक प्रवीण मुंढे, अपर पोलीस अधीक्षक चंद्रकांत गवळी यांच्या निर्देशानुसार उपविभागीय पोलिस अधिकारी सोमनाथ वाघचौरे यांनी मॉकड्रिल घेतले. भुसावळ रेल्वे स्टेशनवर एक बेवारस बॅग असून त्या बॅगमध्ये बॉम्ब सदृश्य वस्तू आहे. तसेच दहशतवादी शिरल्याची माहिती पोलिस नियंत्रण कक्षाला मिळाली. त्यानुसार तात्काळ सर्व पोलिस अधिकारी त्या ठिकाणी पोहोचले. स्थानिक पोलिसांशिवाय शिघ्र कृती दल व बॉम्बशोधक पथकाची देखील गरज आहे, याची खात्री पटल्यानंतर उपविभागीय पोलीस अधिकारी यांनी पोलीस मुख्यालय जळगाव या ठिकाणावरून या दोन्ही पथकांची मागणी केली. काही वेळातच सदरची पथके त्या ठिकाणी पोहोचले. सर्वप्रथम शिघ्र कृतीदल पथकाने दहशतवाद्यांनी ज्या ठिकाणी नागरीकांना ओलीस ठेवले आहेत, त्या ठिकाणाची माहिती घेतली व तत्काळ अतिशय शिस्तबद्ध कारवाई करून सदर ओलीस ठेवलेल्या इसमांची सुटका केली.

तत्परता तपासण्यासाठी मॉकड्रिल
दरम्यानच्या काळामध्ये तेथे असलेल्या पोलिस अंमलदारांनी तसेच आरसीपी पथकाने संपूर्ण परिसर हा निर्मनुष्य केला. त्यानंतर एक-एक साहित्याच्या साहाय्याने रेल्वे स्टेशन पार्किंग मध्ये ठेवण्यात आलेली बेवारस बॅग चेक केली. बॉम्बशोधक पथका कडील डॉगने देखील सहभाग घेतला. बेवारस बॅग शोधून बॉम्ब सदृश्य वस्तू डिफ्युज करण्यात आली. हे सर्व नाट्यमय प्रकार पोलिसांची सुसज्जता, तत्परता तपासणीसाठी करण्यात आली. या सर्व घटामोंडींमुळे मात्र शहरात नेमके काय सुरु आहे, पोलिसांची इतका मोठा ताफा याबाबत चर्चा रंगली हेाती.