भुसावळ खून प्रकरण : आरोपी मुन्ना चौधरीची पोलीस कोठडीत रवानगी

भुसावळ : वाढदिवसाच्या पार्टीतच वाद झाल्याने मित्राची लोखंडी पावडा व धारदार शस्त्राने वार करून हत्या करण्यात आल्याची घटना जामनेर रोडवरील गजानन महाराजांच्या मंदिरासमोर शुक्रवारी मध्यरात्री घडली होती. या घटनेत सचिन ज्ञानदेव भगत (32, श्रद्धा नगर, भुसावळ) या तरुणाचा खून झाला होता. या प्रकरणी आरोपी प्रशांत उर्फ मुन्ना चौधरी यास अटक करण्यात आली होती. आरोपीला शनिवारी न्यायालयात हजर केले असता त्यास पाच दिवसांची पोलीस कोठडी सुनावण्यात आली. दरम्यान, खून प्रकरणी अन्य दोन पसार आरोपींचा पोलिसांकडून कसून शोध सुरू करण्यात आला आहे.

चौघांविरोधात खुनाचा गुन्हा
सचिन भगत या तरुणाच्या खून प्रकरणी त्याची पत्नी सपना सचिन भगत (26, श्रद्धा नगर, भुसावळ) यांनी दिलेल्या फिर्यादीनुसार मुन्ना चौधरी, राहुल कल्ले, जितू पावरा व अन्य इसमाविरोधात बाजारपेठ पोलिसात खुनाचा गुन्हा दाखल करण्यात आला आहे.