नंदुरबार : जिल्हा पोलीस दलाने गुन्हेगारांविरुध्द ऑपरेशन ऑल आऊट मोहीम राबवित कोंबींग, नाकाबंदी दरम्यान 39 गुन्हेगारांना अटक केली. आगामी जिल्हा परीषद व पंचायत समिती पोट निवडणुक व नवरात्रौत्सव दरम्यान समाजकंटकांवर व गुन्हेगारांवर अंकुश राहावा तसेच निवडणूका व सण उत्सव भयमुक्त वातावरणात पार पाडावेत यासाठी खबरदारी म्हणून जिल्हा पोलीस अधीक्षक पी. आर. पाटील यांच्या नेतृत्वाखाली जिल्ह्यात ऑपरेशन ऑल आऊट राबवून कोंबिंग राबवण्यात आले.
विविध गुन्ह्यातील आरोपींना अटक
ऑपरेशन ऑल आऊट दरम्यान पोलीस ठाणे अभिलेखावरील सराईत गुन्हेगार, फरार, पाहिजे, फेर अटक आरोपी, हिस्ट्रीशिटर्स, गँग हिस्ट्रीशिटर्स, अवैध शस्त्रे बाळगणारे, रात्रौ घरफोडी करण्याच्या उद्देशात असलेले, चोरीच्या वस्तू बाळगणारे रात्रौ संशयीतरीत्या फिरणारे, कारागृहातुन सुटुन आलेले आरोपी, स्टँडिंग वॉरंट, नॉन बेलेबल वॉरंट, बेलेबल वॉरंटमधील आरोपीतांचा शोध घेवुन जास्तीत जास्त गुन्हेगार ताब्यात घेवुन त्यांचेविरुध्द् कायदेशीर कारवाई करण्याबाबतच्या सुचना दिल्या होत्या. यासाठी जिल्हा पोलीस दलातील 30 अधिकारी व 150 अंमलदार नेमण्यात आले होते . ऑपरेशन ऑल आऊट दरम्यान जिल्ह्यात 23 ठिकाणी नाकाबंदी लावण्यात आली होती. नाकाबंदी दरम्यान 113 वाहनांची तपासणी करण्यात येवून 27 वाहनांवर कारवाई करण्यात आली.
70 नॉन बेलेवर वॉरंटची बजावणी
जिल्ह्यात प्रलंबीत असलेल्या नॉनबेलेबल वॉरंटपैकी 70 नॉन बेलेबल वॉरंटची बजावणी करुन एकुण 37 आरोपीतांना ताब्यात घेण्यात आले, त्यात 11 आरोपी मयत झालेले होते, परंतु त्यांचा निश्चीत ठावठिकाणा व नातेवाईक यांची माहिती नसल्यामुळे न्यायालयाकडून त्यांच्याविरुध्द नेहमी वॉरंट काढण्यात येत होते, अशा 11 मयत आरोपींचे नातेवाईक शोधुन त्यांचे मयताचे दाखले प्राप्त केले. तसेच 12 आरोपीतांनी न्यायालयात दंड भरुन वॉरंट रद्द केलेले होते असे समजुन आले. त्याचप्रमाणे 63 बेलेबल वॉरंटची बजावणी देखील करण्यात आली असुन 92 समन्सची बजावणी करण्यात आली. नंदुरबार जिल्ह्यातील 81 हिस्ट्रीशीटर्स तपासण्यात आले तसेच 62 हॉटेल , ढाबे, लॉजेस तपासण्यात आल्या. 18 दारुबंदीचे गुन्हे दाखल करण्यात आले आहे. त्यामध्ये 1 लाख 75 हजार 730 रुपये किमंतीची देशी विदेशी दारु व बियर असा मुद्देमाल व 4 लाख रुपये किमतीची अवैध दारुची वाहतुक करण्यासाठी वापरण्यात आलेले चारचाकी वाहन जप्त करण्यात आले आहे.
यांच्या पथकाकडून कारवाई
कारवाई नंदुरबार पोलीस अधीक्षक पी.आर.पाटील यांच्या नेतृत्वाखाली अपर पोलीस अधीक्षक विजय पवार, पोलीस उपअधीक्षक विश्वास वळवी, उप विभागीय पोलीस अधिकारी सचिन हिरे, उपविभागीय पोलीस अधिकारी श्रीकांत घुमरे, उपविभागीय पोलीस अधिकारी, अक्कलकुव्याचे एस.एस.सावंत, स्थानिक गुन्हे शाखेचे पोलीस निरीक्षक रविंद्र कळमकर, सर्व पोलीस ठाण्यांचे प्रभारी अधिकारी व अंमलदार यांनी केली.
