500 डॉलरच्या विम्यासाठी रचला मृत्यूचा डाव : मनोरुग्णास डसवला कोब्रा : पाच जणांना अटक

अहमदनगर : 50 लाख डॉलरची रक्कम विमा स्वरूपात मिळणार असल्याने एकाने चक्क स्वतःच्या मृत्यूची योजना आखली मात्र पोलिसांच्या चौकशीत हा कट उधळण्यात आला असून या प्रकरणी पाच जणांना अटक करण्यात आली. अकोले तालुक्यातील राजूर येथे 22 एप्रिल 2021 रोजी ही घटना घडली होती. मुख्य आरोपी प्रशांत रामहरी चौधरी याच्यासह प्रभाकर भिमाजी वाघचौरे, संदीप तळेकर, हर्षद रघुनाथ लहामगे, हरिश रामनाथ कुलाळ यांना अटक करण्यात आली.

अमेरीकेत काढला विमा
वाघचौरे 20 वर्षांपासून अमेरिकेत राहत होता. तेथे तो हॉटेलमध्ये कूक म्हणून काम करत होता. जानेवारी 2021 मध्ये तो भारतात आला. त्यानंतर तो अकोले तालुक्यातील धामणगावपाट येथे त्याच्या सासुरवाडीला राहत होता. अमेरिकेत असताना वाघचौरे याने ऑल स्टेट इन्शुरन्स कंपनीचा 37 कोटी 57 लाख रुपयांचा जीवन विमा उतरविला होता. विम्याचे पैसे मिळविण्यासाठी त्याने त्याचे नातेवाईक संदीप तळेकर आणि प्रशांत चौधरी यांना विश्वासात घेऊन सात महिन्यांपूर्वी कट रचला. ठरल्याप्रमाणे वाघचौरे आणि त्याच्या साथीदारांनी धामणगाव आवारी येथील मनोरुग्ण नवनाथ यशवंत आनप (50) यास 22 एप्रिलला राजूर परिसरात आणून सर्पदंश केला. आनप हे मृत झाल्यानंतर त्यांना राजूर येथील ग्रामीण रुग्णालयात दाखल करून त्यांचे शवविच्छेदन करून घेतले. त्यानंतर त्यांच्यावर अंत्यसंस्कार केले. राजूर पोलीस ठाण्यात आकस्मिक मृत्यूची नोंद झाली होती. त्यानंतर विम्याचा दावा दाखल केला होता.