बीडगावातील तिघा माय-लेकींवर शोकाकुल वातावरणात अंत्यसंस्कार

हिस्से वाटणीवरून वाद झाल्यानंतर टोकाचे पाऊल
समजलेल्या माहितीनुसार, शिरपूर तालुक्यातील खंबाळे येथे विनोद कोळी यांचे वडिल व आप्तेष्ट राहतात. बुधवारी कोळी दाम्पत्य गावी गेल्यानंतर त्यांच्यात हिस्से वाटणीवरून जोरदार वाद उफाळला व त्यानंतर दाम्पत्य आपल्या दोन्ही मुलीसह गावी बीडगावात परतले मात्र कुटुंबाशी झालेल्या वादानंतर दाम्पत्यातही चर्चा झडली व त्यानंतर विनोद कोळी यांनी शेती उपयोगासाठी असलेले तणनाशक प्राशन करीत आत्महत्या करण्याचा प्रयत्न केला व या घटनेनंतर वर्षा कोळी यादेखील हादरल्या व त्यांनी मुलगी किर्ती व मोनिका यांना सोबत घेत गावाजवळील इकबाल शहादूर तडवी यांच्या विहिरीत आत्महत्या केली. दरम्यान, विनोद कोळी यांना विष प्राशनानंतर जळगावात हलवण्यात आले असतानाच इकडे विवाहितेसह तिच्या मुलींचा रात्रभर शोध सुरू होता मात्र गुरुवारी सकाळी तडवी यांच्या विहिरीत लहान मुलींच्या चपला विहिरीच्या पाण्यावर तरंगताना दिसल्यानंतर संशय बळावला व पोहणार्‍यांना खातरजमा करण्यासाठी पाठवल्यानंतर घटनेचा उलगडा झाला.

खंबाळे येथे शोकाकुल वातावरणात अंत्यसंस्कार
घटनेची माहिती मिळाल्यानंतर प्रभारी पोलिस उपअधीक्षक प्रभाकर डेरे, अडावदचे सहाय्यक निरीक्षक किरण दांडगे, गावातील पोलिस पाटील व ग्रामस्थांनी धाव घेतली. स्थानिक पोहणार्‍यांच्या मदतीने खाट टाकून तीनही माय-लेकींचे मृतदेह बाहेर काढण्यात आले व नंतर शवविच्छेदन झाल्यानंतर ते नातेवाईकांच्या ताब्यात देण्यात आल्यानंतर शोकाकुल वातावरणात तिघांवर अंत्यसंस्कार करण्यात आले. दरम्यान, अडावद पोलिस ठाण्यात पोलिस पाटील रामकृष्ण गोरख पाटील यांच्या खबरीनुसार अकस्मात मृत्यूची नोंद करण्यात आली. अत्यंत प्रतिकुल परीस्थितीत कोळी कुटुंब बीडगावात गेल्या आठ वर्षांपासून उदरनिर्वाह करीत होते मात्र अचानक या कुटुंबावर कोसळलेल्या संकटानंतर सर्वत्र हळहळ व्यक्त करण्यात आली.

• जळगावातील विवाहितेचा जळाल्याने मृत्यू ; घातपात झाल्याचा भावाचा आरोप !