नागपूर : अनैतिक संबंधात अडसर ठरलेल्या पतीची पत्नीने हत्या केली मात्र आत्महत्या केल्याचा बनाव केला. पोलिसांच्या तपासात ही बाब उघड झाली. पतीची गळा आवळून हत्या करणार्‍या महिलेला पारडी पोलिसांनी अटक केली. वडिलांची हत्या करण्यासाठी आरोपी महिलेला तिच्या मुलीनेही मदत केल्याने तिलाही ताब्यात घेण्यात आले. धर्मेंद्र नरेश गजभिये (40) असे मृताचे नाव आहे.
पत्नीचे अफेयर
20 वर्षांपूर्वी त्याचे निशा (36) हिच्याशी लग्न झाले होते. त्यांना 17 वर्षांची मुलगी आहे. गजभिये ट्रक ड्रायव्हर होता. त्याला अंमली पदार्थांचे व्यसन होते. तो वाहन घेऊन नेहमी बाहेरगावी जायचा. त्यामुळे पाच ते सात दिवसानंतर घरी परत यायचा. दरम्यान, त्याच्या पत्नीने दुसरीकडे सूत जुळविल्याचा संशय त्याला आला होता. त्यामुळे पाच वर्षांपासून त्यांच्यात नेहमी खटके उडायचे. आपल्या मागे पत्नी भलतेच काम करते, असा संशय असल्याने गजभियेने घरी सीसीटीव्ही कॅमेरे लावून घेतले होते. त्यातील फुटेज तो नेहमी चेक करायचा अन् नंतर पती-पत्नीत कडाक्याचे भांडण व्हायचे.
पतीचा खून करीत आत्महत्येचा देखावा
11 एप्रिलच्या रात्री असेच झाले. पती-पत्नीत कडाक्याचे भांडण झाले. दोघांनीही एकमेकांना जबर मारहाण केली. यावेळी नशेत असलेल्या गजभियेवर पत्नी निशा हावी झाली. तिने मुलीच्या मदतीने खाली पाडले. त्याच्या छातीवर लाथ ठेवली अन् गळ्याभोवती ओढणीचा फास टाकला. एका बाजूने मुलगी अन् दुसर्‍या बाजूने निशाने हा फास आवळून गजभियेला ठार मारले. दुसर्‍या दिवशी त्याने आत्महत्येचा कांगावा केला. मिळालेल्या माहितीवरून पोलिसांनी अकस्मात मृत्यूची नोंद केली आणि चौकशी सुरू केली. दरम्यान, धर्मेंद्र गजभियेच्या भावाला संशय आल्याने त्यांनी पोलिसांना पती-पत्नी आणि त्यांच्यातील वादाची माहिती सांगितली. 16 एप्रिलला डॉक्टरांनी पोलिसांना अहवाल दिला. त्यात गळा आवळल्याने गजभियेचा मृत्यू झाल्याचे नमूद केले. त्यावरून पोलिसांनी हत्येचा गुन्हा दाखल करून आरोपी निशा आणि तिच्या मुलीला रात्री ताब्यात घेतले.
