Two-wheeler hits Eicher in high speed : Kakarde youth killed on the spot अमळनेर : ओव्हरटेकच्या प्रयत्नात भरधाव दुचाकी आयशर वाहनावर आदळून झालेल्या अपघातात नंदुरबार तालुक्यातील काकरर्दे येथील 28 वर्षीय तरुण जागीच ठार झाला तर अन्य एक जखमी झाला. हा अपघात सोमवार, 27 रोजी सकाळी 11 वाजेच्या सुमारास आश्रमशाळेजवळ घडला. अरविंद रामदास माळी (28, रा.काकरदे, ता.नंदुरबार) असे ठार झालेल्या तरुणाचे नाव असून गणेश अहिरे हा दुचाकीवरील मित्र जखमी झाला आहे.
आयशर थांबल्याने दुचाकी आदळली
अरविंद रामदास माळी (28) व गणेश अहिरे हे दुचाकी (क्र. एम.एच.39 ए.जी.0964) ने धरणगाव येथे नातेवाईकांच्या वर्षश्राद्ध कार्यक्रमासाठी येत असताना ताडेपुरा भागातील आश्रम शाळेजवळ अज्ञात आयशर गाडीने त्यांना ओव्हरटेक केले व पुढे जाऊन ब्रेक मारल्याने मागून आलेली दुचाकी आयशरवर धडकल्याने दुचाकीस्वार अरविंद माळी याच्या डोक्याला जबर मार लागल्याने त्याला उपचारासाठी ग्रामीण रुग्णालयात दाखल केले असता वैद्यकीय अधिकारी यांनी मयत घोषित केले. या अपघातात गणेश अहिरे जखमी झाला असून अपघात प्रकरणी अविनाश जिभाऊ वाघ याने दिलेल्या फिर्यादीवरून अमळनेर पोलिसात अज्ञात आयशर चालकाविरुद्ध गुन्हा दाखल करण्यात आला. पुढील तपास पोलिस कॉन्स्टेबल सुनील पाटील करीत आहेत.
