रावेर लोकसभेसाठी महाविकास आघाडीकडून भुसावळचे माजी आमदार संतोष चौधरींना संधी !

Former Bhusawal MLA Santosh Choudhary gets a chance from Mahavikas Aghadi for Raver Lok Sabha ! भुसावळ : महाराष्ट्रात लोकसभा निवडणुकीसाठी भाजपाने उमेदवार जाहीर केल्यानंतर मविआचे घोडे अद्यापही जागा वाटपाअभावी अडल्याचे चित्र आहे. अशातच रावेरच्या जागेवर खडसे परीवारातील सदस्यांनी निवडणूक
लढवण्यास नकार दिल्यानंतर या जागेवर आत भुसावळचे माजी आमदार संतोष चौधरींना संधी मिळण्याचे संकेत आहे. भुसावळात माजी आमदार चौधरींना संकेत मिळणार असल्याचे वृत्त धडकताच चौधरी समर्थकांनी फटाक्यांची आतषबाजी करीत पेढे वाटून जल्लोष केला. दरम्यान, चौधरी यांच्या नावाची अद्याप अधिकृतरीत्या घोषणा झाली नसलीतरी चौधरी यांच्या नावावर शिक्कामोर्तब झाले असल्याची माहिती सूत्रांनी दिली. मंगळवार, 19 रोजी माजी आमदार चौधरी शहरात दाखल होणार असून ते आल्यानंतर अनेक बाबींचा उलगडा होणार आहे.

तर माजी आमदार चौधरी उमेदवार
रावेर लोकसभेसाठी खासदार रक्षा खडसे यांना तिसर्‍यांदा भाजपाने संधी दिल्यानंतर मविआकडून मात्र या जागेवर अद्यापही उमेदवार निश्चित झालेला नाही. आमदार एकनाथराव खडसे यांनी प्रकृतीचे कारण देत निवडणूक लढवण्यास स्पष्टपणे नकार दिला तर दुसरीकड अ‍ॅड.रोहिणी खडसे यांनी लोकसभा निवडणूक लढवण्यास नकार देत आपण विधानसभा निवडणुकीसाठी इच्छूक असल्याचे स्पष्ट केल्यानंतर आता मविआकडून तुल्यबळ उमेदवार म्हणून भुसावळचे माजी आमदार संतोष चौधरी यांच्याकडे पाहिले जात आहे. शरद पवार यांनी चौधरी यांना बोलावत त्यांच्याशी याबाबत चर्चादेखील केल्याची माहिती सूत्रांनी दिली.