‘कॉकरोच जनता पार्टी’ ला ज्येष्ठ समाजसेवक अण्णा हजारेंचा पाठिंबा

अण्णा हजारे म्हणाले, युवाशक्ती हीच राष्ट्रशक्ती
लोकपाल आंदोलनाचे जनक अण्णा हजारे यांनी कॉकरोच जनता पार्टीबाबत भाष्य करताना सरकारला मोलाचा सल्ला दिला. ते म्हणाले, झुरळ हे नाव कदाचित योग्य वाटणार नाही, पण या पार्टीचा उद्देश समजून घेणे गरजेचे आहे. नाव काहीही असले तरी देशातील तरुण या पार्टीच्या पाठीशी उभा आहे. युवाशक्ती हीच राष्ट्रशक्ती असते. जेव्हा या दोन्ही शक्तींचा संगम होतो, तेव्हा सरकारने त्यांचा अव्हेर न करता त्यांना प्रोत्साहन दिले पाहिजे.

बंदीनंतर पुन्हा उभारी ; इन्स्टाग्राम खाते परत मिळाले
काही दिवसांत कॉकरोच जनता पार्टीचे ’एक्स’, ’इन्स्टाग्राम’ अकाऊंट आणि त्यानंतर 10 लाख नोंदणी झालेले अधिकृत संकेतस्थळ बंद करण्यात आले होते. यंत्रणांनी दिलेल्या या झटक्यानंतरही सीजेपीने हार मानलेली नाही. संस्थापक अभिजीत दीपके यांनी ‘एक्स’वर पोस्ट करत माहिती दिली की, त्यांनी त्यांचे इन्स्टाग्राम खाते पुन्हा मिळवले असून पक्ष नव्या दमाने कामाला लागला आहे.

छत्रपती संभाजीनगरमध्ये पोलिस बंदोबस्त तैनात
दरम्यान, या आभासी पक्षामुळे चर्चेत आलेले अभिजीत दीपके यांना अज्ञात व्यक्तींकडून धमक्या आल्याची धक्कादायक माहिती समोर आली आहे. या पार्श्वभूमीवर छत्रपती संभाजीनगर पोलिस प्रशासन सतर्क झाले असून, सिडको वाळूज महानगर-1 येथील त्यांच्या पालकांच्या घरासमोर कडक पोलिस बंदोबस्त तैनात करण्यात आला आहे. सुरक्षिततेसाठी दोन अधिकारी आणि 22 कर्मचार्‍यांची नियुक्ती करण्यात आली असून संपूर्ण परिसरात सीसीटीव्ही कॅमेर्‍यांच्या माध्यमातून लक्ष ठेवले जात आहे.