धरणगाव तालुक्यात रिफाइंड तेलापासून भेसळयुक्त कृत्रिम दुधाची विक्री : एकाच संशयीतावर वर्षभरात दुसर्यांदा कारवाई
Sale of Adulterated Artificial Milk Made from Refined Oil in Dharangaon Taluka: Action Taken Against the Same Suspect for the Second Time in a Year धरणगाव (28 मे 2026) : धरणगाव तालुक्यात भेसळयुक्त कृत्रिम दूध तयार करून विक्री जात असताना प्रशासनाने कारवाई केल्यानंतर खळबळ उडाली आहे. सोमनाथ आनंद माळी (32, रा. भवरखेडा, ता. धरणगाव) असे संशयिताचे नाव असून तो रिफाइंड पामोलीन तेलासह विविध रसायनांचा वापर करून कृत्रिम दूध तयार करत असल्याचा आरोप आहे. तपासात समोर आलेल्या माहितीनुसार, हे भेसळयुक्त दूध चांगल्या दुधात मिसळून त्यातील फॅटचे प्रमाण कृत्रिमरीत्या वाढवले जात होते. त्यानंतर आर्थिक फायद्यासाठी त्याची विक्री केली जात असल्याचे उघड झाले.
नागरिकांच्या आरोग्याला धोका
या प्रकारामुळे नागरिकांच्या आरोग्याला गंभीर धोका निर्माण झाला असून जनतेच्या जीवाशी थेट खेळ होत असल्याचे समोर आले आहे. अन्न सुरक्षा अधिकारी आकाश कैलास बोराडे यांच्या तक्रारीवरून धरणगाव पोलिसात गुन्हा दाखल करण्यात आला.
वर्षभरापूर्वीही झाली होती कारवाई
विशेष म्हणजे, जुलै 2025 मध्येही अन्न व औषध प्रशासन आणि पोलिसांनी संयुक्त कारवाई करत भवरखेडा येथे संशयिताच्या घरावर छापा टाकला होता. त्यावेळी कृत्रिम दूध तयार करण्यासाठी वापरण्यात येणारी घातक रसायने, साहित्य आणि उपकरणे जप्त करण्यात आली होती. प्राथमिक चौकशीत संशयिताने कृत्रिम दूध तयार करून विक्री करत असल्याची कबुली दिल्याची माहिती समोर आली होती. त्या प्रकरणी अन्न सुरक्षा अधिकारी किशोर साळुंखे यांच्या तक्रारीवरून धरणगाव पोलीस ठाण्यात गुन्हा दाखल करण्यात आला होता. मात्र, त्यानंतरही संशयिताने हा अवैध व्यवसाय पुन्हा सुरू ठेवल्याचे तपासात निष्पन्न झाले आहे.
गुप्त माहितीच्या आधारे संयुक्त छापा
अन्न सुरक्षा विभागाला मिळालेल्या गुप्त माहितीनुसार पोलिस आणि अन्न व औषध प्रशासनाच्या संयुक्त पथकाने संशयिताच्या घरावर पुन्हा छापा टाकला. या कारवाईत भेसळयुक्त दूध तयार करण्यासाठी वापरली जाणारी रसायने, पामोलीन तेल तसेच विविध उपकरणे आढळून आली. संबंधित साहित्य जप्त करण्यात आले असून पुढील तपास सुरू आहे.दुधासारख्या अत्यावश्यक अन्नपदार्थात भेसळ करून नागरिकांच्या आरोग्याशी खेळ करणार्यांविरोधात कठोर कारवाई करण्याची मागणी नागरिकांकडून होत आहे.
