पदाचा गैरवापर करून बेकायदेशीर भरती : धुळ्यातील ‘आत्मा’चा माजी प्रकल्प संचालक एसीबीच्या जाळ्यात

गणेश वाघ
Illegal recruitment through abuse of office: Former Project Director of Dhule’s ‘ATMA’ caught by ACB भुसावळ (19 जून 2026) : धुळ्यातील कृषी तंत्रज्ञान व्यवस्थापन यंत्रणा (आत्मा) चे तत्कालीन प्रकल्प संचालक बबन नथ्थू पाटील यांनी आपल्या पदाचा गैरवापर करून गट तंत्रज्ञान व्यवस्थापक व सहाय्यक तंत्रज्ञान अधिकारी पदांची बेकायदेशीर भरती केल्याप्रकरणी त्यांच्याविरुद्ध लाचलुचपत प्रतिबंधक विभागाने मोहाडी पोलिसात गुन्हा दाखल करीत त्यांना बेड्या ठोकल्या आहेत. विशेष म्हणजे बबन पाटील यांनी आपल्या आई-वडिलांच्या खात्यात भरती प्रक्रियेतील उमेदवारांकडून तब्बल 16 लाख 85 हजार रुपये स्वीकारल्याचे एसीबीच्या तपासात उघड झाले आहे. धुळे एसीबीच्या या कारवाईने शासकीय यंत्रणेतील भ्रष्टाचार्‍यांचे धाबे दणाणले आहे.

काय आहे प्रकरण ?
धुळे लाचलुचपत प्रतिबंधक विभागाकडून मिळालेल्या माहितीनुसार, धुळ्यातील कृषी तंत्रज्ञान व्यवस्थापन यंत्रणा (आत्मा) येथे तत्कालीन प्रकल्प अधिकारी असलेल्या बबन पाटील यांनी 5 डिसेंबर 2015 ते जुलै 2018 या कालावधीत आपल्या पदाचा गैरवापर केला. शासन आदेश नसतानाही बेकायदेशीररित्या गट तंत्रज्ञान व्यवस्थापक व सहाय्यक तंत्रज्ञान अधिकारी या पदांची भरती करण्यात आली. गट तंत्रज्ञान व्यवस्थापक व सहाय्यक तंत्रज्ञान अधिकारी या पदावर नेमणूक देण्यासाठी आपल्या आई-वडीलांच्या खात्यात तब्बल 16 लाख 85 हजार रुपये स्वीकारले व बनावट नियुक्तीपत्रे देवून शासनाची व उमेदवारांची फसवणूक केली. शासकीय पदाचा दुरुपयोग करून शासनाचे नुकसान केल्याने धुळे एसीबीने चौकशी करून शुक्रवारी सायंकाळी मोहाडी पोलिसात आरोपीविरोधात विविध कलमान्वये गुन्हा दाखल करण्यात आला व त्यास अटक करण्यात आली.