महाराष्ट्र शिक्षक पात्रता परीक्षेच्या पार्श्वभूमीवर जळगाव शहरात प्रतिबंधात्मक आदेश लागू
Restrictive orders imposed in Jalgaon city in view of the Maharashtra Teacher Eligibility Test जळगाव (25 जून 2026) : महाराष्ट्र शिक्षक पात्रता परीक्षा (टीईटी) रविवार, 28 जून 2026 रोजी जळगाव शहरातील 30 परीक्षा केंद्रांवर सकाळी आठ ते सायंकाळी पाच या वेळेत होत आहे. या परीक्षेदरम्यान परीक्षा केंद्रांवर होणारे गैरप्रकार रोखण्यासाठी तसेच कॉपीमुक्त अभियान प्रभावीपणे राबविण्यासाठी प्रतिबंधात्मक उपाययोजना करण्यात आल्या आहेत.
जळगावात 30 परीक्षा केंद्रे
या परीक्षेसाठी जळगाव शहरात 30 परीक्षा केंद्रे निश्चित करण्यात आली असून परीक्षेच्या कालावधीत परीक्षा केंद्र परिसरात गैरप्रकार होण्याची तसेच कायदा व सुव्यवस्थेचा प्रश्न निर्माण होण्याची शक्यता लक्षात घेऊन अपर जिल्हादंडाधिकारी, जळगाव यांनी भारतीय नागरी सुरक्षा संहिता, 2023 मधील कलम 163 अन्वये आदेश निर्गमित केले आहेत.
या आदेशानुसार, 28 जून 2026 रोजी पेपर सुरू झाल्यापासून ते पेपर समाप्त होईपर्यंत (सकाळी 8.00 ते सायंकाळी 5.00) जळगाव शहरातील सर्व परीक्षा केंद्रांच्या 100 मीटर परिसरात कोणालाही प्रवेश करण्यास मनाई करण्यात आली आहे. मात्र, हा आदेश परीक्षार्थी, नियुक्त अधिकारी व कर्मचारी, पोलीस अधिकारी व कर्मचारी तसेच होमगार्ड यांना लागू राहणार नाही.
तसेच, सर्व परीक्षा केंद्रांच्या 500 मीटर परिसरातील झेरॉक्स दुकाने संबंधित कालावधीत बंद ठेवण्याचे निर्देश देण्यात आले आहेत.
हा आदेश संबंधितांना वैयक्तिकरित्या नोटीस बजावण्यासाठी पुरेसा कालावधी उपलब्ध नसल्याने भारतीय नागरी सुरक्षा संहिता, 2023 च्या कलम 163 नुसार एकतर्फी स्वरूपात निर्गमित करण्यात आला असल्याचे अपर जिल्हादंडाधिकारी वैशाली चव्हाण यांनी कळविले आहे.
