जळगाव जिल्हापेठ पोलिसांची मोठी कामगिरी : चोरीच्या मोटारसायकलींसह त्रिकूट जाळ्यात

Major achievement by Jalgaon Jilhapeth Police: Trio nabbed with stolen motorcycles. जळगाव (शुक्रवार, 17 जुलै 2026) : शहरातील वाढत्या मोटारसायकल चोरीच्या घटनांवर आळा घालण्यात जिल्हापेठ पोलिसांना मोठे यश आले आहे. विशेष तपास मोहिमेदरम्यान तीन स्वतंत्र कारवाईयांमध्ये त्रिकूटाला ताब्यात घेतल्यानंतर त्यांच्याकडून एकूण 11 चोरीच्या मोटारसायकली जप्त करण्यात आल्या. आरोपींनी लगतच्या मध्यप्रदेशासह जळगाव, फैजपूर व चोपडा भागातून दुचाकी चोरल्याची कबुली दिली आहे.

तांत्रिक व गोपनीय माहितीवरून कारवाई
शहरात वाढलेल्या वाहनचोरीच्या घटनांची गंभीर दखल घेत पोलीस अधीक्षक श्रीकांत धिवरे यांनी सर्व पोलीस ठाण्यांना विशेष मोहीम राबविण्याचे निर्देश दिले होते. त्यानुसार जिल्हापेठ पोलीस ठाण्याचे प्रभारी सहाय्यक निरीक्षक  अनिल वाघ यांच्या नेतृत्वाखाली विशेष पथकाची स्थापना करण्यात आली. पथकाने सीसीटीव्ही फुटेज, तांत्रिक विश्लेषण आणि गुप्त माहितीच्या आधारे तपासाची सूत्रे हलविली.

दुचाकी चोरट्यांचे त्रिकूट जाळ्यात
तपासादरम्यान सिव्हिल हॉस्पिटल परिसरातून चोरीस गेलेल्या मोटारसायकल प्रकरणात जियाउलहक अब्दुलहक शेख (34, रा.आझादनगर, अडावद, ता.चोपडा) याला ताब्यात घेण्यात आले. चौकशीत त्याने विविध ठिकाणी मोटारसायकल चोरी केल्याची कबुली दिली. त्याच्याकडून दोन लाख 20 हजार रुपये किंमतीच्या सात मोटारसायकली जप्त करण्यात आल्या. या वाहनांची चोरी जळगाव, पारोळा, शिरपूर, चोपडा, यावल तसेच मध्य प्रदेशातील विविध भागांतून झाल्याचे निष्पन्न झाले आहे.

अन्य दोन संशयीतही जाळ्यात
दुसर्‍या गुन्ह्याच्या तपासात उमेश प्रदीप पाटील (22, रा.पिंगळवाडी, ता. अमळनेर, सध्या रायपूर एमआयडीसी, जळगाव) याला अटक करण्यात आली. त्याच्याकडून एक लाख 75 हजार रुपये किंमतीच्या तीन चोरीच्या मोटारसायकली जप्त करण्यात आल्या. या वाहनांचा संबंध एमआयडीसी आणि फुले मार्केट परिसरातील चोरीच्या गुन्ह्यांशी असल्याचे तपासात समोर आले आहे.

नियमित पेट्रोलिंगदरम्यान 17 रोजी कैलास वसंतदास मथुरे (28, रा.जुनोने, ता.जामनेर) हा संशयास्पदरीत्या चोरीच्या हिरो एचएफ डिलक्स मोटारसायकलसह आढळून आला. चौकशीत हे वाहन सोयगाव पोलीस ठाण्यात दाखल असलेल्या चोरीच्या गुन्ह्यातील असल्याचे निष्पन्न झाले. त्याच्याकडून 35 हजार रुपये किंमतीची मोटारसायकल जप्त करून आरोपी व वाहन पुढील तपासासाठी सोयगाव पोलिसांच्या ताब्यात देण्यात आले. या तिन्ही कारवायांमध्ये एकूण 11 चोरीच्या मोटारसायकली आणि 4.30 लाख रुपयांचा मुद्देमाल हस्तगत करण्यात आला.

यांनी केली कारवाई
ही कारवाई पोलीस अधीक्षक डॉ. श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली जिल्हापेठ सहाय्यक निरीक्षक अनिल वाघ, एएसआय संजय दोरकर, हवालदार महेश महाजन, महेंद्र पाटील, किरण वानखेडे, जितेंद्र सुरवाडे, राजेश पदमर, संतोष सोनवणे, तेजस मराठे, अमित मराठे, प्रशांत सैंदाणे, प्रवीण जाधव, अजय सपकाळे, कमलाकर बडगुजर, नरेंद्र दिवेकर, संजय लाटे, अजय आहिरे आदींच्या पथकाने केली.