रावेर पोलिसांची मोठी कारवाई : आभोडा येथे गोमांस विक्री करणार्‍या दोन ठिकाणांवर धाड : सुमारे 600 किलो गोमांस जप्त

रावेर (शुक्रवार, 7 ऑगस्ट 2026) : रावेर पोलीस स्टेशनच्या गुन्हे शोध पथकाने आभोडा गावात गोमांस विक्री होत असल्याची गुप्त माहिती मिळाल्यानंतर शुक्रवार, 7 ऑगस्ट रोजी सकाळी धडक कारवाई करत दोन ठिकाणांवर छापा टाकला. या कारवाईत एकूण सुमारे 600 किलो गोमांस, जनावरांची कत्तल करण्यासाठी वापरण्यात येणार्‍या दोन कुर्‍हाडी व दोन सुरे जप्त केले या शिवाय कत्तलीच्या उद्देशाने आठवडे बाजार परिसरात बांधून ठेवलेल्या तीन गोवंशाची सुटका केली. दरम्यान, रावेर हद्दीत कुठेही गोवंशाची कत्तल होत असल्यास माहिती देण्याचे आवाहन रावेर पोलिसांनी केले आहे.

गोपनीय माहितीवरून कारवाई
रावेर पोलिसांनी दिलेल्या माहितीनुसार, आभोडा गावातील बसस्थानक परिसरात एका घरात जनावरांची कत्तल करून गोमांस विक्री सुरू असल्याची माहिती गुन्हे शोध पथकाला मिळाली होती. त्यानुसार पोलीस उपनिरीक्षक मनोज महाजन व त्यांच्या पथकाने छापा टाकला असता, उस्मान हसन कुरेशी (48, रा.आभोडा) याच्या ताब्यातील घरात जनावरांची कत्तल करून गोमांस कापण्याचे काम सुरू असल्याचे आढळून आले. या कारवाईत अंदाजे 300 किलो गोमांस, एक कुर्‍हाड व एक सुरा जप्त करण्यात आला.