मुदखेड न्यायालयाचा महत्त्वपूर्ण निकाल : निष्काळजी कारचालकाला दोन वर्षांचा कारावास

या प्रकरणातील आरोपी राघवेंद्र नामदेव पवितवार (रा.मुदखेड) याने 16 फेब्रुवारी 2024 रोजी दुपारी सुमारे 3 वाजेच्या सुमारास बारड येथून मुदखेडकडे येताना कार (एम.एच.26 सी.बी.7722) भरधाव व निष्काळजीपणे चालवत रस्त्याने पायी जात असलेल्या अरुणाबाई हनुमंत टिमकेकर यांना जोरदार धडक दिली. या अपघातात अरुणाबाई टिमकेकर यांचा मृत्यू झाला, तर सत्वशीला दिगंबर वानखेडे या गंभीर जखमी झाल्या.

या घटनेनंतर मुदखेड पोलीस ठाण्यात गुन्हा क्रमांक 253/2024 अंतर्गत भारतीय दंड संहितेच्या कलम 337, 338 आणि 304(अ) अन्वये गुन्हा दाखल करण्यात आला होता.

या प्रकरणाचा तपास पोलीस उपनिरीक्षक शिवाजी शिंदे यांनी केला असून त्यांना हेड कॉन्स्टेबल केशव कदम यांनी सहकार्य केले.

न्यायालयीन सुनावणीदरम्यान राज्य सरकारतर्फे सरकारी वकील सचिन बी.पवार यांनी प्रभावी बाजू मांडली, तर आरोपीच्या वतीने अ‍ॅड.के.डी. हामंद यांनी काम पाहिले.

दोन्ही बाजूंचा युक्तिवाद आणि उपलब्ध पुरावे विचारात घेत न्यायालयाने आरोपीला दोषी ठरवत दोन वर्षांच्या कारावासाची शिक्षा तसेच दंडाची शिक्षा सुनावली. निष्काळजी वाहनचालकांविरोधात न्यायालयाने दिलेला हा निर्णय रस्ते सुरक्षेच्या दृष्टीने महत्त्वपूर्ण मानला जात आहे.