मुंबई (मंगळवार, 11 ऑगस्ट 2026) : आठ लाख रुपयांची लाच उकळल्याप्रकरणी राज्यकर उपायुक्त दीपक क्षीरसागर यांना अटक करण्यात आल्याने लाचखोर हादरले आहेत. नवी मुंबई लाचलुचपत प्रतिबंधक विभागाने (एसीबी) ही धडक कारवाई करत त्यांना माझगाव येथील विक्रीकर विभागाच्या कार्यालयातून ताब्यात घेतले. जीएसटी स्कुटनी आणि जीएसटी क्रेडिटच्या नोटीसची चौकशी थांबवण्यासाठी 15 लाखांची मागणी करून आठ लाख स्वीकारल्याप्रकरणी कारवाई करण्यात आली.
तपासादरम्यान, कोकण भवन (बेलापूर) येथील विक्रीकर विभागात सहायक आयुक्त पदावर कार्यरत असताना त्यांनी ही लाच स्वीकारल्याचे निष्पन्न झाले आहे. याप्रकरणी सीबीडी बेलापूर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, आरोपी दीपक क्षीरसागर यांनी बजावलेल्या एका जीएसटी स्कुटनी आणि जीएसटी क्रेडिट नोटीसची चौकशी थांबवण्यासाठी तक्रारदाराकडे 15 लाख रुपयांच्या लाचेची मागणी केली होती. तक्रारदारासोबत तडजोड करून त्यांनी 8 लाख रुपये लाच म्हणून स्वीकारल्याचा आरोप तक्रारदाराने केला होता.
तक्रारदाराच्या अर्जावरून नवी मुंबई लाचलुचपत प्रतिबंधक विभागाचे पोलीस उपअधीक्षक धर्मराज सोनके यांच्या मार्गदर्शनाखाली या प्रकरणाची सखोल चौकशी सुरू होती. चौकशी दरम्यान दीपक क्षीरसागर यांनी आठ लाखांची लाच घेतल्याचे निष्पन्न झाल्यानंतर मंगळवारी लाचलुचपत प्रतिबंधक पथकाने माझगाव येथील विक्रीकर भवन कार्यालयात छापा टाकून त्यांना ताब्यात घेतले आणि बेलापूर पोलीस ठाण्यात गुन्हा दाखल करून अधिकृत अटक केली.
