यावल (बुधवार, 2 सप्टेंबर 2026) : रावेर व यावल तालुक्यातील विविध गावांमध्ये पशुधनावर लंपी स्किन डिसिज या संसर्गजन्य रोगाचा वाढता प्रादुर्भाव आढळून येत असल्याने पशू पालकांमध्ये चिंता निर्माण झाली आहे. या पार्श्वभूमीवर आमदार अमोलभाऊ जावळे यांनी जिल्हा पशुसंवर्धन विभागाला तातडीने प्रतिबंधात्मक उपाययोजना करण्याच्या सूचना केल्या आहे.
बाधीत जनावरांच्या विलगीकरणाची मागणी
रावेर व यावल तालुक्यातील बाधित तसेच संभाव्य बाधित गावांमध्ये तातडीने पशुवैद्यकीय पथके पाठवून जनावरांची तपासणी करावी, बाधित जनावरांचे विलगीकरण करावे तसेच आवश्यक औषधोपचार व रोगप्रतिबंधक उपाययोजना करण्यात याव्यात, अश्या सूचना आमदार जावळे यांनी केल्या. विशेष लसीकरण मोहीम राबवून पुरेशा प्रमाणात लस, औषधे व पशुवैद्यकीय मनुष्यबळ उपलब्ध करून द्यावे, अशा स्पष्ट सूचना संबंधित यंत्रणेला देण्यात याव्यात. रोगाचा प्रसार रोखण्यासाठी पशुपालकांमध्ये जनजागृती करून जनावरांची काळजी, विलगीकरण आणि प्रतिबंधात्मक उपायांबाबत आवश्यक मार्गदर्शन करण्याची गरजही त्यांनी व्यक्त केली. प्राण्यांमधील संक्रमण व सांसर्गिक रोग प्रतिबंध व नियंत्रण अधिनियम, 2009 अंतर्गत आवश्यक त्या प्रतिबंधात्मक उपाययोजना तातडीने राबवून रोगाचा प्रसार इतर गावांमध्ये तसेच शेजारील जिल्ह्यांमध्ये होणार नाही, यासाठी प्रभावी नियोजन करण्याच्या सूचनाही त्यांनी केल्या आहेत.
लंपी रोगामुळे बाधित अथवा मृत झालेल्या पशुधनाबाबत शासनाच्या प्रचलित नियमांनुसार आवश्यक ती कार्यवाही करून पात्र पशुपालकांना शक्य ती मदत उपलब्ध करून द्यावी, अशी सूचना आमदार अमोल जावळे यांनी केली आहे.
पशुधन हे शेतकर्यांच्या अर्थव्यवस्थेचा महत्त्वाचा आधार असून, लंपी रोगाचा वाढता प्रादुर्भाव लक्षात घेता प्रशासनाने कोणतीही दिरंगाई न करता तातडीने प्रभावी उपाययोजना व विशेष लसीकरण मोहीम राबवावी, अशी भूमिका आमदार जावळे यांनी व्यक्त केली आहे.
