भुसावळचे माजी प्रभारी नगराध्यक्ष अनिल चौधरी शिवसेनेच्या ‘शिंदे’ गटात

नव्या राजकीय समीकरणांची नांदी
प्रहार जनशक्ती पक्षाचे नेते बच्चू कडू यांच्या नेतृत्वावर विश्वास ठेवून अनिल चौधरी हे त्यांच्यासोबत गेल्यानंतर त्यांना उत्तर महाराष्ट्र अध्यक्षपद मिळाले होते मात्र बच्चू कडू हे शिंदेसोबत गेल्याने त्यांनीदेखील धनुष्यबाण हाती घेतला आहे. चौधरी यांनी मुंबईतील एकनाथ शिंदे यांच्या ‘नंदनवन’ बंगल्यावर बुधवारी उपमुख्यमंत्री शिंदे यांच्या उपस्थितीत प्रवेश करून काही महिन्यांपासून सुरू असलेल्या चर्चांना पूर्णविराम दिला. चौधरी यांच्या पक्ष प्रवेशामुळे भुसावळच्या स्थानिक राजकारणात अनेक चर्चांना सुरूवात झाली आहे तर आगामी स्थानिक स्वराज्य संस्थांमधील राजकीय समीकरणे, आगामी निवडणुका आणि विविध राजकीय गटांतील संभाव्य आघाड्या या पार्श्वभूमीवर त्यांच्या प्रवेशाकडे विशेष लक्ष दिले जात आहे.

राज्यात शिवसेना वाढवणार! आजीवन साहेबांसोबतच ; अनिल चौधरी
विधानपरिषद निवडणुकीत उपमुख्यमंत्री एकनाथ शिंदे यांच्या म्हणण्यानुसार आम्ही फार्म मागे घेतला होता. संघर्षातून वलय निर्माण करणारे उपमुख्यमंत्र्यांचे व्यक्तीमत्व असून संपूर्ण जीवन आता साहेबांसोबत व्यतीत करायचे आहे, राज्यभरात शिवसेना वाढवायची आहे, असे अनिल चौधरी म्हणाले. आपल्यासोबत भुसावळच्या माजी नगराध्यक्षा गायत्री भंगाळे व निखील संतोष चौधरी यांनीदेखील प्रवेश केल्याचे ते म्हणाले.

भुसावळातील अल्पसंख्यांक भागाचा विकास होणार
चौधरी म्हणाले की, भुसावळातील अल्पसंख्यांक भागाचा विकास थांबला आहे त्यामुळे साहेबांच्या आदेशानुसार आता येथून पुढे काम करणार आहोत. भुसावळच्या अल्पसंख्यांक भागासाठी निधी देण्याचे आश्वासन आम्हाला मिळाले असून पक्ष संघटना मजबूत करण्याचा संदेशही साहेबांनी दिला आहे. मोठे बंधू माजी आमदार संतोष चौधरी यांनादेखील सोबत येण्याची विनंती केली मात्र त्यांनी आपली पवार साहेबांवर निष्ठा असल्याचे सांगितले. यापुढे जळगाव जिल्ह्याचे पालकमंत्री गुलाबराव पाटील यांच्या आशीर्वादाने प्रत्येक काम करू, असेदेखील चौधरी म्हणाले.