राज्यात पुन्हा पावसाचा जोर ; पुढील चार दिवस जोरदार सरींचा अंदाज

बंगालच्या उपसागरातील प्रणालीचा परिणाम
बंगालच्या उपसागरातील नवीन हवामान प्रणाली मध्य भारताच्या दिशेने सरकत आहे. ओडिशा, छत्तीसगड आणि मध्य प्रदेशातून ही प्रणाली पुढे सरकत असल्याने 4 ते 10 सप्टेंबरदरम्यान राज्यात पावसाचा जोर वाढण्याची शक्यता आहे. विशेषतः विदर्भ आणि मराठवाड्यात या हवामान बदलाचा प्रभाव अधिक जाणवेल, अशी माहिती हवामान तज्ज्ञ माणिकराव खुळे यांनी दिली.

छत्रपती संभाजीनगरात सोसाट्याच्या वार्‍यासह पावसाची शक्यता
छत्रपती संभाजीनगर शहरात गुरुवारी दुपारनंतर किंवा संध्याकाळच्या सुमारास मेघगर्जनेसह पावसाची शक्यता आहे. यावेळी ताशी 30 ते 40 किलोमीटर वेगाने वारे वाहण्याचा अंदाज असल्याने नागरिकांनी सतर्क राहण्याचे आवाहन करण्यात आले आहे. बुधवारी शहरात कमाल तापमान 29.8 अंश सेल्सिअस, तर किमान तापमान 22 अंश सेल्सिअस नोंदवले गेले. दिवसभरात 0.2 मिमी पावसाची नोंद झाली. सकाळी हवेतील आर्द्रता 85 टक्के, तर सायंकाळी 69 टक्के होती. 4 सप्टेंबर रोजी आकाश अंशतः ढगाळ राहून पावसाच्या एक-दोन सरींची शक्यता हवामान विभागाने व्यक्त केली आहे.

जळगावात तापमान तीन अंशांनी घसरले
जळगाव जिल्ह्यात गेल्या दोन दिवसांपासून वातावरणात लक्षणीय बदल झाला आहे. दिवसभर दाटून येणारे ढग आणि अधूनमधून पडणार्‍या हलक्या सरींमुळे कमाल तापमानात सुमारे तीन अंशांची घट झाली आहे. हवेतील आर्द्रता वाढल्याने पहाटे आणि रात्री गारवा जाणवू लागला आहे. हे वातावरण आणखी काही दिवस कायम राहण्याची शक्यता हवामान अभ्यासक नीलेश गोरे यांनी व्यक्त केली.

जळगावात पुढील चार दिवस पावसाच्या सरी

3 सप्टेंबर : काही भागांत हलक्या ते मध्यम सरींची शक्यता.

4 सप्टेंबर : जिल्ह्यात तुरळक ठिकाणी हलका पाऊस पडण्याचा अंदाज.

5 सप्टेंबर : काही निवडक भागांत रिमझिम आणि हलक्या सरी.

6 सप्टेंबर : आकाश ढगाळ राहण्याची शक्यता; शहरासह जिल्ह्यात तुरळक ठिकाणी पावसाची नोंद होऊ शकते.