समृद्धी महामार्गावरील लुटीचा मास्टरमाइंड दिल्लीतील ऑटो मार्केटमध्ये जेरबंद

छोले-भटुरे खाताना पोलिसांची झडप
परशुरामचे लोकेशन मिळाल्यानंतर एलसीबीचे विशेष पथक तातडीने दिल्लीला रवाना झाले. दिल्लीतील एका ठिकाणी परशुराम आणि त्याचा साथीदार छोले-भटुरे खात बसले असताना साध्या वेशातील पोलिसांनी परिसराला वेढा घातला. आरोपींना कोणतीही चाहूल लागू न देता पथकाने अचानक झडप घालत दोघांना ताब्यात घेतले.

नातेवाईकाच्या नावाने घेतलेले सीम ठरले कळीचे
पोलिसांना चकवा देण्यासाठी परशुराम स्वतःचा मोबाइल वापरत नव्हता. लोकेशन ट्रेस होऊ नये म्हणून तो ऑनलाइन व्यवहारही टाळत होता. बहुतांश व्यवहारांसाठी रोख रक्कम वापरण्यासोबतच संपर्कासाठी इतरांचे वायफाय वापरत असल्याची माहिती तपासात समोर आली. मात्र, सुमारे महिनाभरापूर्वी नातेवाइकाच्या नावाने घेतलेले नवीन सिमकार्ड त्याने दिल्लीत सुरू केले. हीच चूक त्याच्यासाठी अडचणीची ठरली. सायबर पोलिसांना या सिमकार्डच्या आधारे त्याचे लाइव्ह लोकेशन मिळाले आणि त्यानंतर एलसीबीच्या पथकाने दिल्ली गाठून त्याला अटक केली.

पाच जिल्ह्यांत गुन्ह्यांची नोंद
परशुराम गायकवाड हा पाच जिल्ह्यांतील विविध गुन्ह्यांमध्ये पोलिसांना हवा होता. त्याच्यावर एमपीडीएची कारवाईही प्रस्तावित/लागू असल्याने तो फरार होता. समृद्धी महामार्गावरील लुटीच्या तपासादरम्यान त्याचा ठावठिकाणा शोधण्यात ग्रामीण पोलिसांना यश आले. या टोळीने आणखी किती गुन्हे केले आहेत, याचा तपास पोलिसांकडून सुरू आहे.