भरधाव आयशरने उडवले : दुई गावातील दोन्ही महिला ठार

मुक्ताईनगर (शुक्रवार, 11 सप्टेंबर 2026) : भरधाव आयशर वाहनाने धडक दिल्याने झालेल्या अपघातात मुक्ताईनगर तालुक्यातील दुई येथील 44 व 56 वर्षीय महिला जागीच ठार झाली. हा अपघात 10 रोजी सकाळी चार ते साडेचार वाजेच्या सुमारास घडला. या प्रकरणी मुक्ताईनगर पोलिसात अज्ञात आयशर चालकाविरोधात गुन्हा दाखल करण्यात आला. छाया मोतीराम पाटील (44, दुई) व शोभा कडू पाटील (56, दोन्ही रा.दुई) अशी ठार झालेल्या महिलांची नावे आहेत.

पहाटेच्या सुमारास अपघात
सूत्रांच्या माहतीनुसार, छाया पाटील (44) व शोभा पाटील (56) या शहिला पूर्णाड फाटा ते कुर्‍हा रस्त्यावरील प्राथमिक आरेाग्य केंद्राजवळील रस्त्यावरून शौचावरून परत असताना कुठल्यातरी भरधाव आयशर वाहनाने या महिलांना जबर धडक दिली. या धडकेत छाया पाटील यांचा जागीच मृत्यू झाला तर शोभा पाटील या गंभीर जखमी झाल्याने त्यांना जळगावात उपचारार्थ हलवण्यात आले मात्र त्यांचाही मृत्यू झाला. अपघातानंतर अज्ञात वाहन चालक वाहनासह पसार झाला.

दरम्यान, अपघातात मृत्युमुखी पडलेल्या दोन्ही महिलांचे पती शेतमजुरी करून कुटुंबाचा उदरनिर्वाह करतात. छायाबाई यांच्या पश्चात पती, मुलगा व मुलगी असा परिवार आहे. शोभाबाई यांच्या पश्चात पती, मुलगा, दोन मुली असा परिवार आहे. या घटनेने दोन्ही कुटुंबांवर दुःखाचा डोंगर कोसळला आहे.

दरम्यान, अपघात प्रकरणी भागवत ज्ञानेश्वर पाटील (25 मूळ रा.दुई, ह.मु.बालाजी नगर, पुणे) यांच्या फिर्यादीवरून अज्ञात वाहन चालकाविरोधात गुन्हा दाखल करण्यात आला. तपास पोलीस निरीक्षक आशिष अडसुळ यांच्या मार्गदर्शनाखाली हवालदार राजकुमार चव्हाण करीत आहेत.