जळगावातील बेपत्ता महिलेचा पद्मालयाजवळील जंगलात खून : संशयीताला अटक

जळगाव (बुधवार, 15 सप्टेंबर 2026) : जळगावातून सात दिवसांपूर्वी बेपत्ता झालेल्या 38 वर्षीय महिलेचा एरंडोल तालुक्यातील पद्मालय जवळच्या जंगलात डोक्यात दगड टाकून सहकारी मित्रानेच खून केल्याचा प्रकार समोर आला आहे. या प्रकरणी एमआयडीसी पोलिसांनी संशयीत आरोपीला अटक केली. कविता अरुण सुतार (38) असे खून झालेल्या महिलेचे तर नरेश उर्फ आबा अनिल सोनवणे (29, रा.रामेश्वर कॉलनी, जळगाव) असे अटकेतील संशयीताचे नाव आहे.

काय आहे प्रकरण ?
कविता सुतार या काही वर्षांपासून पतीपासून विभक्त राहून मुलांसह जळगावात वास्तव्यास होत्या. 8 सप्टेंबरपासून त्या बेपत्ता झाल्यानंतर याबाबत 9 सप्टेंबरला पोलिसात हरवल्याची तक्रार दाखल करण्यात आली. तपासादरम्यान कविता या नरेश सोनवणे याच्यासोबत दुचाकीवरून जाताना दिसल्याची माहिती पोलिसांना मिळाल्यानंतर पोलिसांनी दोघांचा शोध सुरू केला. कविताच्या मोबाईलचे लोकेशन म्हसावदजवळ मोबाईल बंद झाल्यानंतर समोर आल्यानंतर सीसीटीव्ही फुटेज तपासले असता दोघेही सोबत दिसले. पोलिसांनी एरंडोलच्या दिशेनेही सोसीटीव्ही तपासल्यानंतर एरंडोलजवळील पद्मालयच्या जंगल परिसरात महिलेचा दगडाने चेहरा ठेचलेल्या अवस्थेत मृतदेह आढळला. नातेवाईकांना बोलावल्यानंतर त्यांनी कविताने घरातून निघताना घातलेले कपडे ओळखताच आक्रोश केला.