घट विकून कुटुंबाला हातभार लावण्याची धडपड ठरली अखेरची ; ट्रकच्या धडकेत दोघांचा मृत्यू
निफाड (रविवार, 11 ऑक्टोबर 2026) : नवरात्रोत्सवाच्या पार्श्वभूमीवर घट विकून कुटुंबाला आर्थिक हातभार लावण्याचा प्रयत्न करणार्‍या दोघांचा भरधाव आयशर ट्रकच्या धडकेत मृत्यू झाल्याची दुर्दैवी घटना नाशिक-निफाड मार्गावर घडली. शुक्रवारी (दि. 9 ऑक्टोबर) सायंकाळी सुमारे 5.45 वाजता झालेल्या या अपघातात अभिषेक अशोक वाघचौरे (31) आणि भिका चिमाजी धुळे (60) यांचा मृत्यू झाला. अपघातानंतर ट्रकचालक वाहनासह फरार झाला असून, निफाड पोलिसांकडून त्याचा शोध सुरू आहे.
मिळालेल्या माहितीनुसार, नाशिकहून निफाडच्या दिशेने जाणार्‍या आयशर ट्रकवरील चालकाचे नियंत्रण सुटल्याने हा अपघात झाला. ट्रकच्या धडकेत दोघांना गंभीर दुखापत झाली. या दुर्घटनेत त्यांचा मृत्यू झाल्याने परिसरात हळहळ व्यक्त होत आहे.
अभिषेक वाघचौरे हे वाहनचालक म्हणून काम करण्यासोबतच शेतात आणि नर्सरीमध्ये मजुरी करून कुटुंबाचा उदरनिर्वाह करत होते. प्रतिकूल परिस्थितीत कुटुंबाची जबाबदारी सांभाळणार्‍या अभिषेक यांच्या मृत्यूमुळे त्यांच्या पत्नीचा जीवनसाथी, तर एका मुलाचा आणि एका मुलीचा पितृछत्र हरपले आहे.
नवरात्रोत्सवाच्या काळात घट विक्री करून कुटुंबाला हातभार लावण्याच्या प्रयत्नात असताना घडलेल्या या अपघातामुळे दोन कुटुंबांवर दुःखाचा डोंगर कोसळला आहे. घटनेनंतर ट्रकचालक घटनास्थळावरून वाहनासह पसार झाला. निफाड पोलिसांनी घटनास्थळाचा पंचनामा करून पुढील तपास सुरू केला असून, फरार चालकाचा शोध घेतला जात आहे.
