भुसावळात 203 सार्वजनिक मंडळांत आदिशक्तीची स्थापना

शुभ मुहूर्तावर घटस्थापना
नवरात्रोत्सवाच्या पहिल्या दिवशी पहाटेपासूनच भाविकांची घटस्थापनेची तयारी सुरू होती. सकाळी 6 वाजून 19 मिनिटे ते 10 वाजून 12 मिनिटे या कालावधीत तसेच अभिजात मुहूर्तावर सकाळी 11 वाजून 44 मिनिटे ते दुपारी 12 वाजून 31 मिनिटे या वेळेत अनेक ठिकाणी देवीच्या घटाची स्थापना करण्यात आली. घराघरांत धार्मिक वातावरण निर्माण झाले आहे.

भुसावळात 203 सार्वजनिक मंडळे
भुसावळ शहरात यंदा सार्वजनिक नवरात्रोत्सवाची मोठ्या प्रमाणावर तयारी करण्यात आली आहे. मिळालेल्या माहितीनुसार, भुसावळ बाजारपेठ पोलीस ठाण्याच्या हद्दीत 130 तर भुसावळ शहर पोलीस ठाण्याच्या हद्दीत 73 सार्वजनिक मंडळांनी नवदुर्गेची स्थापना केल्याचे सांगण्यात आले.

आवाज मर्यादा ओलांडल्यास होणार कारवाई
गणेशोत्सवात आवाजाची मर्यादा ओलांडणार्‍या मंडळावर पोलिसांनी कारवाई करीत त्याबाबत अहवाल न्यायालयात पाठवला असून नवरात्रोत्सवाही नॉईस मीटरद्वारे आवाजाची तपासणी करण्यात येईल, असे पोलीस सूत्रांनी सांगितले. ध्वनिप्रदूषणासंबंधीच्या मर्यादा आणि उत्सवाच्या वेळेबाबत घालून दिलेल्या अटींचे पालन करण्याचे आवाहन करण्यात आले आहे. शहरातील देवी मंदिरांसह सार्वजनिक नवरात्रोत्सव मंडळांच्या परिसरात आकर्षक विद्युत रोषणाई, फुलांची सजावट आणि भव्य मंडप उभारण्यात आले आहेत.