जळगाव-पाळधी बायपासवरील उड्डाणपुलाच्या दुरुस्तीदरम्यान भीषण दुर्घटना ; क्रेन चालकाचा मृत्यू
जळगाव (शनिवार, 24 ऑक्टोबर 2026) : जळगाव-पाळधी बायपासवरील उड्डाणपुलाच्या दुरुस्तीचे काम सुरू असतानाच शुक्रवारी भीषण दुर्घटना घडली. दुरुस्तीसाठी वापरण्यात येणार्‍या क्रेनचा साईड गर्डर उचलत असताना तोल जाऊन गर्डर सुमारे 50 ते 60 फूट खाली कोसळला. या दुर्घटनेत क्रेन चालकाचा जागीच मृत्यू झाला. मधुकर धनराज पाटील ( 44, रा. वंजारी खपाट, ता.धरणगाव) असे मृत चालकाचे नाव आहे. या घटनेमुळे उड्डाणपुलाच्या दुरुस्तीच्या कामाच्या सुरक्षिततेचा प्रश्न पुन्हा ऐरणीवर आला आहे.
दुरुस्तीचे काम सुरू असताना दुर्घटना
जळगावजवळील पाळधी गाव परिसरात रेल्वेमार्गावर असलेल्या उड्डाणपुलाच्या दुरुस्तीचे काम सुरू आहे. या कामांतर्गत पुलाचा साईड गर्डर क्रेनच्या मदतीने उचलण्यात येत होता. त्याचवेळी क्रेनचा तोल गेल्याने गर्डर सुमारे 50 ते 60 फूट उंचीवरून खाली कोसळला. या दुर्घटनेत क्रेन चालक मधुकर पाटील यांचा मृत्यू झाला.
यापूर्वीही कोसळला होता पुलाचा भाग
या उड्डाणपुलाच्या निकृष्ट दर्जाच्या कामाबाबत यापूर्वीही स्थानिकांकडून तक्रारी करण्यात आल्या होत्या. सुमारे अडीच महिन्यांपूर्वी या पुलाचा काही भाग कोसळल्याची घटना घडली होती. त्यानंतर जिल्ह्यातील आमदार आणि खासदारांनी घटनास्थळी भेट देऊन पाहणी केली होती. या घटनेनंतर पुलावरून होणार्‍या वाहतुकीच्या सुरक्षिततेबाबत चिंता व्यक्त करण्यात येत होती.
तीन महिन्यांपासून वाहतुकीचा प्रश्न गंभीर
यापूर्वी तरसोद येथील रेल्वे उड्डाणपुलाचा भराव कोसळल्याची घटना घडली होती. त्यानंतर बायपास महामार्गावरील संबंधित भागाच्या दुरुस्तीचे काम हाती घेण्यात आले. या कामामुळे गेल्या तीन महिन्यांपासून महामार्गावर एकेरी वाहतूक सुरू आहे. परिणामी, वाहनचालकांना वाहतूक कोंडी, प्रवासासाठी लागणारा अतिरिक्त वेळ आणि अपघातांचा धोका अशा विविध समस्यांना सामोरे जावे लागत आहे. पाळधी ते तरसोद बायपास हा जळगाव परिसरातील वाहतुकीच्या दृष्टीने महत्त्वाचा मार्ग आहे. या मार्गावरून दररोज मोठ्या प्रमाणात वाहनांची ये-जा होते. मात्र, दुरुस्तीच्या कामामुळे वाहतुकीवर मर्यादा आल्याने वाहनचालकांची गैरसोय वाढली आहे.
अपघातांच्या मालिकेमुळे सुरक्षिततेचा प्रश्न ऐरणीवर
गेल्या अडीच ते तीन महिन्यांपासून या परिसरात अपघातांच्या घटना घडत असल्याने महामार्गावरील सुरक्षिततेबाबत प्रश्न उपस्थित होत आहेत. दुरुस्तीचे काम करताना आवश्यक सुरक्षा उपाययोजना केल्या जात आहेत का, याची तपासणी करण्याची मागणी स्थानिकांकडून होण्याची शक्यता आहे. दरम्यान, क्रेन चालकाच्या मृत्यूमुळे परिसरात हळहळ व्यक्त करण्यात आली.
