अजित पवारांच्या मनात दोन्ही राष्ट्रवादींच्या एकत्रीकरणाचा निर्णय पक्का होता ! 12 फेब्रुवारीची तारीखही ठरली होती ; सुनील तटकरे

‘जवळचा सहकारी असल्याने संपूर्ण नियोजनाची माहिती होती’
अजित पवार यांच्याशी असलेल्या जवळच्या संबंधांचा उल्लेख करत तटकरे म्हणाले की, स्वर्गीय अजितदादांनी विलिनीकरणाच्या प्रक्रियेबाबत त्यांना पूर्ण कल्पना दिली होती. एकत्रीकरणाचे स्वरूप कसे असेल, याबाबतही त्यांनी सविस्तर चर्चा केली होती. जवळचा सहकारी म्हणून या संपूर्ण प्रक्रियेची आपल्याला माहिती होती. त्यामुळे ठरल्याप्रमाणे विलिनीकरण पूर्ण होईल, असा विश्वास होता.

अजितदादांच्या निधनानंतर विलिनीकरणाचा विषय मागे पडला
अजित पवार यांच्या अपघाती निधनामुळे दोन्ही राष्ट्रवादी काँग्रेसच्या एकत्रीकरणाचा विषय तिथेच थांबला, अशी खंत सुनील तटकरे यांनी व्यक्त केली. अजितदादांची प्रबळ इच्छाशक्ती आणि त्यांचे नियोजन यामुळे विलिनीकरण प्रत्यक्षात आले असते; मात्र त्यांच्या निधनाने ही प्रक्रिया पुढे जाऊ शकली नाही, असे त्यांनी सांगितले.

तटकरे यांच्या गौप्यस्फोटाने राजकीय चर्चांना उधाण
सुनील तटकरे यांच्या या वक्तव्यामुळे महाराष्ट्राच्या राजकीय वर्तुळात नव्या चर्चांना सुरुवात झाली आहे. दोन्ही राष्ट्रवादी काँग्रेसच्या एकत्रीकरणासाठी प्रत्यक्ष हालचाली सुरू होत्या आणि त्यासाठी तारीखही निश्चित झाली होती, असा दावा प्रथमच इतक्या स्पष्टपणे समोर आल्याने या घडामोडींना महत्त्व प्राप्त झाले आहे. अजित पवार यांनी आखलेला विलिनीकरणाचा आराखडा, त्यामागील राजकीय गणित आणि पुढील नेतृत्वाची भूमिका याबाबत आता उत्सुकता निर्माण झाली आहे.