सहा जणांविरुद्ध गुन्हा : हल्ल्यात फिर्यादीचा भाऊ व आईदेखील जखमी
भुसावळ : शहरातील शनी मंदिर वॉर्डात किरकोळ वादाचे हाणामारीत रूपांतर होवून चाकू व रॉडने हल्ला करण्यात आल्याने दोघे भाऊ जखमी झाले तर तक्रारदाराच्या आईलादेखील शिवीगाळ करून मारहाण केल्याप्रकरणी बाजारपेठ पोलिसात सहा संशयीतांविरुद्ध गुन्हा दाखल करण्यात आला. शनिवारी रात्री नऊ वाजेच्या सुमारास ही घटना घडल्याने शहरात खळबळ उडाली. घटनेची माहिती कळताच पोलिस उपअधीक्षक्षक सोमनाथ वाघचौरे, सहा.अधीक्षक अर्चित चांडक व बाजारपेठ पोलिसांनी धाव घेतली.
रूमाल घेतल्यावरून उफाळला वाद
मनीष दिनेश पाटील (16, शनी मंदिर वॉर्ड, भुसावळ) यांच्या फिर्यादीनुसार संशयीत आरोपीने लांब रूमाल घेतल्याने तो 12 रोजी मागितल्याने वाद झाला होता व 13 रोजी संशयीतांनी या वादाची कुरापत काढून शिवीगाळ व मारहाण केली व याबाबत तक्रारदाराने आपला भाऊ कुणाल पाटील यास ही बाब सांगितल्यानंतर दोघांनी आरोपींना विचारणा केल्याने आरोपींना राग आला व त्यांनी आपल्या पालकांना बोलावल्याने वाद विकोपाला गेला. तक्रारदाराच्या पाठीवर चाकू मारण्यात आला तर त्यांचे भाऊ कुणाल यांना रॉड मारून जखमी करण्यात आले. तक्रारदार रुग्णालयात व कुणाल हे पोलिसांना माहिती देण्यासाठी गेल्याने घरी एकट्या असलेल्या तक्रारदाराच्या आई सुवर्णा पाटील यांचे केस ओढून एका आरोपीने वरच्या मजल्यावरून खाली आणले व अन्य आरोपींनी त्यांना शिवीगाळ करून मारहाण केल्याचा आरोप आहे. या प्रकरणी बाजारपेठ पोलिसांकडून या घटनेचा बारकाईने तपास सुरू असून गुन्ह्यात काही संशयीत अल्पवयीन असल्याचे सांगण्यात आले.
