भुसावळात पोलिसांच्या कोम्बिंगमध्ये तिघे वॉण्टेड जाळ्यात

भुसावळ : भुसावळातील गुन्हेगारी नियंत्रीत ठेवण्यासाठी पोलिस उपअधीक्षक सोमनाथ वाघचौरे यांच्या नेतृत्वात शुक्रवारी मध्यरात्रीनंतर शहर व बाजारपेठ पोलीस ठाणे हद्दीत कोम्बिंग ऑपरेशन राबवण्यात येवून गुन्हेगारांची झाडाझडती घेण्यात आली. त्यात वॉण्टेड तिघे गुन्हेगारांच्या मुसक्या आवळण्यात आल्या तर संशयास्पदरीत्या फिरणार्‍या चौघांना घेवून त्यांच्यावर भादंवि 122 प्रमाणे कारवाई करण्यात आली. तसेच रात्री उशिरापर्यंत हॉटेल सुरू ठेवल्याने एका हॉटेल चालकावर कारवाई करण्यात आली.

चार ट्रक चालकांना दंड
पोलिसांनी रात्री शहरातील विविध भागात नाकाबंदी केली. जामनेर रोड, पंधरा बंगला, बाजारपेठ पोलीस ठाणे समोर, गांधी पुतळा येथे रात्री 12 ते 4 या वेळात नाकाबंदी केल्यानंतर वाहनांची तपासणी करण्यात आली. पंधरा बंगला परिसरात सुध्दा वाहनांची गर्दी होताच पोलिस निरीक्षक दिलीप भागवत यांनी धाव घेतली. तेथे चार ट्रक मिळून आल्याने त्यांच्याकडून प्रत्येकी एक हजार रुपयांप्रमाणे दंड करण्यात आला. कोम्बिंगमध्ये सहा.पोलीस निरीक्षक अनिल मोरे, कृष्णा भोये, गणेश धुमाळ, एपीआय संदीप दुनगहू व शहर व बाजारपेठचे कर्मचारी सहभागी झाले होते.