महात्मा फुले मागासवर्गीय विकास महामंडळात साडेसहा कोटींचा अपहार : संशयीताला पोलिस कोठडी

भुसावळ : महात्मा फुले मागासवर्गीय विकास महामंडळाच्या योजनेत साडे सहा कोटी रुपयांच्या अपहार प्रकरणी जळगाव आर्थिक गुन्हे शाखेत गुन्हा दाखल आहे. या प्रकरणी गुरुवार, 24 जून रोजी मुख्य एजंट संदीप प्रभाकर सावळे (36, रा.भुसावळ) यास अटक करण्यात आल्यानंतर न्यायालयाने 27 पर्यंत पोलीस कोठडी सुनावली होती. कोठडीची मुदत संपल्यानंतर त्यास रविवारी न्यायालयात हजर केले असता पुन्हा दोन दिवसांची पोलीस कोठडी सुनावण्यात आली. दरम्यान, शुक्रवारी जळगाव गुन्हे शाखेच्या पथकाने साबळे याच्या गणेश नगरातील घराची झडती घेतली मात्र त्यात काहीही आढळले नव्हते. संशयीत आरोपीकडे एक कोटी तीन लाखांच्या रकमेबाबत विचारपूस सुरू असल्याची तपासाधिकारी निरीक्षक बळीराम हिरे यांनी दिली.

बोगस लाभार्थी दाखवून अपहार
महात्मा फुले मागासवर्गीय विकास महामंडळाने केलेल्या चौकशीत 702 बोगस लाभार्थी दाखवून महामंडळाचे अधिकारी, बँक अधिकारी, कर्मचारी व 40 ते 50 एजंट अशांनी बोगस कागदपत्रांद्वारे तब्बल साडे सहा कोटी रुपयांचा अपहार केला. या प्रकरणी महात्मा फुले मागासवर्गीय विकास महामंडळाच्या जिल्हा व्यवस्थापक वैशाली अनिश जाधव यांच्या फिर्यादीवरुन 2 ऑगस्ट 2019 रोजी रामानंद नगर पोलीस ठाण्यात याप्रकरणी गुन्हा दाखल होवून तो जळगाव आर्थिक गुन्हे शाखेकडे वर्ग करण्यात आला. या गुन्ह्यात या आधी महामंडळाचा व्यवस्थापक खंडू विठोबा लोहकरे (46, रा.नाशिक), अकांऊटंट सागर वसंत अडकमोल (39, रा.रवीराज कॉलनी), सुनंदा बाबुराव तायडे (59, रा.वानखेडे हौसिंग सोसायटी), प्रकाश लक्ष्मीकांत कुळकर्णी (रा.राधाकृष्ण नगर), अमरीश अनिल मोकाशी (रा.सदगुरु नगर) व संजीव वसंत सोनवणे (रा.भुसावळ) यांना अटक झाली आहे तर मुकेश देवराम बारमासे (रा.नागपूर) यांना अटकपूर्व जामीन मंजूर झाला आहे.