बचत गटांना जिल्ह्याबाहेर व्यासपीठ उपलब्ध करून देणार

आमदार शिरीष चौधरी : फैजपूरला महिला बचत गट निर्मित ‘सरस्वती वस्तू भांडार’च्या दालनाचा शुभारंभ

फैजपूर : रावेर-यावल मतदार संघातील महिला भगिनींच्या बचत गटांना भविष्यात जिल्हा बाहेर मोठे व्यासपीठ उपलब्ध करून देणार असल्याची ग्वाही आमदार शिरीष चौधरी यांनी येथे दिली. महिला बचत गट निर्मित ‘सरस्वती वस्तू भांडार’च्या दालनाचा शनिवार, 21 रोजी सकाळी 11 वाजता शुभारंभ केला. यावेळी ते बोलत होते.

कृषी विज्ञान केंद्रातर्फे मिळाले व्यासपीठ
सातपुडा विकास मंडळ संचालित कृषी विज्ञान केंद्र, पालतर्फे या बचत गटांना येथील औषध निर्माण-शास्त्र महाविद्यालयासमोर व्यासपीठ उपलब्ध करून देण्यात आले. यावेळी आमदार शिरीष चौधरी यांनी निवडणुकीपूर्वी मतदार संघातील बचत गटांच्या महिलांना त्यांच्या मालाची विक्री करण्यासाठी व्यासपीठ उपलब्ध करून देण्याचा शब्द दिला होता मात्र कोरोनामुळे त्यास विलंब झाल्याची कबुली देत भविष्यात जळगाव, पुणे, नाशिक, मुंबई यासह अन्य जिल्हा ठिकाणी बचत गटांचे प्रदर्शन लावून त्यांना व्यासपीठ उपलब्ध करून देण्याची ग्वाही दिली. माजी आमदार अरुण पाटील यांनी या उपक्रमाचे कौतुक करून महिलांना आर्थिकदृष्टय सक्षम करण्यासाठी उचललेले पाऊल कौतुकास्पद असल्याचे सांगितले. आमदार शिरीष चौधरी यांचे पुत्र धनंजय चौधरी यांनी मतदारसंघातील महिलांसाठी हे प्राथमिक स्वरूपात उचललेले छोटेसे पाऊल आहे. भविष्यात अशा उपक्रमासाठी काहीही सहकार्य लागत असल्यास निसंकोच सांगावे त्यासाठी सदैव तत्पर असल्याची ग्वाही दिली.