पुणे : ५० हजार रुपयांची लाच घेताना लाच लुचपत प्रतिबंधक विभागाने हवेली पंचायत समिती गट शिक्षणाधिकाऱ्यासह दोघांना अटक केल्याने शैक्षणिक वर्तुळात मोठी खळबळ उडाली आहे. गट शिक्षणाधिकारी रामदास शिवनाथ वालझाडे (५०) आणि पालक शिक्षक संघाचे प्रतिनिधी विकास नंदकुमार धुमाळ (४०) अशी अटक केलेल्या दोघांची नावे आहेत. शिक्षण हक्क कायद्यानुसार मिळालेल्या प्रवेशाला कागदपत्रे तपासून ऑनलाईन मान्यता देण्यासाठी लाचेची मागणी करण्यात आली होती. हवेली पंचायत समितीच्या बाहेर लाच लुचपत प्रतिबंधक विभागाने सापळा रचून ही कारवाई केली. याप्रकरणी, दोघांच्या विरुद्ध बंडगार्डन पोलिस ठाण्यात गुन्हा दाखल करण्यात आले आहे. विकास धुमाळ याची हवेली पंचायत समितीकडून शालेय शिक्षण प्रवेशासाठी गठित करण्यात आलेल्या प्रवेश पडताळणी समितीचा सदस्य म्हणून पालक शिक्षक संघाचा प्रतिनिधी म्हणून नेमणूक करण्यात आली होती. तक्रारदार यांच्या मुलीचे बालकांचा मोफत व सक्तीच्या शिक्षणाचा अधिकार अधिनियम (आरटीई) अन्वये हडपसर येथे एका शाळेत लॉटरी पद्धतीने मिळणाऱ्या प्रवेश यादीत नाव समाविष्ट करायचे होते. त्याकरीता कागदपत्रे तपासून ऑनलाईन मान्यता देण्यासाठी त्यांनी अर्ज केला होता. ही मान्यता देण्यासाठी आरोपी विकास धुमाळ याने गटशिक्षणाधिकारी वालझोडे यांच्यासाठी ५० हजारांची लाचेच्या लाचेची मागणी केली होती. याबाबत तक्रारदार यांनी लाच लुचपत प्रतिबंधक विभागाकडे धाव घेत तक्रार दिली. त्यानुसार ३१ ऑगस्ट रोजी पडताळणी करण्यात आली. त्यावेळी लाच मागितल्याचे निष्पन्न झाले. त्यानुसार हवेली पंचायत समीतीच्या कार्यालयाबाहेर सापळा लावला होता. त्यावेळी धुमाळ याला लाच घेताना अटक करण्यात आली.
मेहनत कर, मेहनत ! कॉपी पेस्ट करू नको !
