प्रवाशांचे हाल : पाचोरा आगाराचे कर्मचारी संपावर

पाचोरा : पाचोरा आगारातील सुमारे 287 कर्मचारी हे रविवार, 7 नोव्हेंबर दुपारी 2.30 वाजेपासून बेमुदत संपावर गेल्याने प्रवाशांचे अतोनात हाल होत आहे.

राजीनामे देत बेमुदत संपाची हाक
गेल्या काही दिवसांपासून राज्यातील संपूर्ण एस. टी. महामंडळाचे कर्मचारी संघटनांच्या माध्यमातून संपावर गेले होते परंतु राज्य शासनाने ठराविक मागण्या मान्य करत उर्वरीत रास्त मागण्या मान्य न केल्याने पाचोरा आगारातील विविध संघटनांच्या पदाधिकार्‍यांनी राजीनामे देत बेमुदत संपास सुरुवात केली आहे. कर्मचार्‍यांमुळे पाचोरा आगाराचे लाखो रुपयांचे नुकसान होत असून ऐन दिवाळी सारख्या सणात प्रवाशांना आपला जीव धोक्यात घालून खाजगी प्रवाशी वाहतुकीने प्रवास करावा लागत आहे. एस.टी.महामंडळाचे राज्य शासनात विलीनीकरण व्हावे व शासकीय कर्मचार्‍यांप्रमाणे सर्व भत्ते व सुविधा जशास तशा मिळाव्यात या प्रमुख मागण्यांसाठी राज्यातील अनेक आगारातील कनिष्ठ कर्मचारी गेल्या काही दिवसांपासून संपावर आहेत. त्यातील राज्य शासनाने ठरावीक मागण्या मान्य करत एस. टी. कर्मचार्‍यांच्या विविध संघटनांना उर्वरित मागण्याही लवकरात लवकर मान्य करण्यात येतील असे आश्वासन दिले होते परंतु 15 दिवस उलटुनही उर्वरित मागण्या मान्य न झाल्याने रविवार, 7 रोजी दुपारी 2:30 वाजेपासून पाचोरा आगारातील कर्मचारी संपावर गेले आहे.यामुळे प्रवाशांना मोठ्या प्रमाणात त्रास सहन करावा लागत आहे.