रावेरात अवैध दारू विक्रीवर शिक्कामोर्तब ; चार ठिकाणी कारवाई

रावेर : रावेर तालुक्यातील ढाब्यांवर अनधिकृतरीत्या दारू विक्री होत असल्याचे वृत्त समाजमाध्यमातून धडकताच राज्य उत्पादन शुल्क विभागाच्या अधिकारी गोटात प्रचंड खळबळ उडाली. झोपेचे सोंग घेवून असलेल्या अधिकार्‍यांनी अखेर चार ढाब्यांची तपासणी करीत कारवाई केल्याने अनधिकृतरीत्या दारू विक्री करणार्‍यांच्या गोटात मोठी खळबळ उडाली. या विभागाचे दुय्यम निरीक्षक टेंगळे यांनी बर्‍हानपूर-अंकलेश्वर महामार्गावील ढाब्यांची तपासणी केली. यात चार ढाब्यांवर अवैध दारू विक्री होत असल्याचे निदर्शनास आल्याने कारवाई करण्यात आली.

अखेर कारवाईबाबत आली जाग
बनावट दारूकडे दुर्लक्ष झाल्याने कर्तव्यात कसूरचा ठपका ठेवत यापूर्वी राज्य उत्पादन शुल्क विभागाच्या चार जणांना जुलै महिन्यात निलंबित केले होते. त्यानंतर किमान कारवाई होईल अशी अपेक्षा असताना परीस्थिती जैसे-थे निर्माण झाली. रावेर तालुक्यात जेवणाच्या ढाब्यावर अवैधरीत्या दारू विक्री होत असून निरीक्षकांचे दुर्लक्ष होत असल्याचे वृत्त समाजमाध्यमात प्रसिद्ध झाले होते. या वृत्ताची दखल घेऊन मंगळवारी रात्री महामार्गाला लागून असलेल्या ढाब्यावर कारवाई करण्यात आली.

अवैध दारू प्रकरणी चार ढाब्यांवर कारवाई
यावल-बर्‍हाणपूर महामार्गावर राज्य उत्पादन शुल्क विभागाच्या भरारी पथकाने मंगळवार, 14 च्या रात्री कारवाई करण्यात आली. यामध्ये चार ढाब्यावर कारवाई करण्यात आली. यात देशी-विदेशी दारूसह बियर मिळून नऊ हजार 120 रुपयांचे मद्य जप्त करण्यात आल्याचे दुय्यम निरीक्षक टेंगळे म्हणाले.