मरीमातेच्या जयघोषात फैजपूरात ओढल्या बारागाड्या
फैजपूर : मरीमातेचा जयघोष करीत मंगळवारी सायंकाळी शेकडो भाविकांच्या उपस्थितीत बारागाड्या उत्साहात ओढण्यात आल्या. दरवर्षी श्रावण महिन्यात दुसर्या मंगळवारी या बारागाड्या ओढल्या जातात. भगत संजय कोल्हे व त्यांचे सहकारी यांनी या बारागाड्या ओढल्या. यावेळी भाविकांनी मरीमातेचा जयघोष केला. तत्पूर्वी मंगळवारी दुपारी शहरातून वाजत-गाजत भगत व सहकारी यांची मिरवणूक काढण्यात आली. त्यानंतर बर्हाणपूर-अंकलेश्वर मार्गावरील म्युन्सीपल हायस्कूलजवळून ते सुभाष चौकापर्यंत बारागाड्या भगत संजय कोल्हे व त्यांचे सहकारी राजू मेढे, खुशाल गाजरे यांनी ओढल्या. यावेळी भगत कोल्हे यांनी बारागाड्यांना प्रदक्षिणा सुद्धा घातली. त्यानंतर मरीमातेचे दर्शन घेतले. यावेळी शहर तथा परीसरातील भाविक मोठ्या संख्येने बारागाड्या ओढण्याचा कार्यक्रम पाहण्यासाठी उपस्थित होते. सहाय्यक निरीक्षक प्रकाश वानखेडे, फौजदार मनीष ठाकुर, जिजाबराव पाटील, सहाय्यक फौजदार विजय पाचपोळ, होमगार्ड समादेशक विकास कोल्हे, गुप्तवार्ताचे मोहन लोखंडे, यशवंत काकडे व त्यांच्या सहकार्यांनी यावेळी चोख बंदोबस्त ठेवला.
