राजोरे गावातील तरुणाला ऑनलाईन ट्रेडींगमध्ये 27 लाखांचा गंडा
यावल : यावल तालुक्यातील राजोरे या गावातील एका 36 वर्षीय तरुणाची दोन अज्ञातांनी ऑनलाईन ट्रेडिंगमध्ये जास्त फायदा करून देऊ असे सांगून तब्बल 26 लाख 74 हजारात फसवणूक केली. तरुणाला दोघांनी एक टेलिग्रामवरील लिंक पाठवुन त्याचा विश्वास संपादन करून रजिस्ट्रेशन करायला लावले आणि त्याचा विश्वासघात करून त्याची फसवणूक केली. याप्रकरणी जळगाव सायबर पोलिसात गुन्हा दाखल करण्यात आला.
असे आहे फसवणूक प्रकरण
राजोरे, ता.यावल येथील रहिवासी चेतन विनायक नेहेते (36) या तरुणाला टेलिग्राम या सोशल साईटवर दीपक राज व लेझर्ड एव्हीलीन नामक सोशल नेटवर्कवरील आयडी असलेल्या दोघांनी संपर्क साधला व त्यांचा विश्वास संपादन करून आम्ही तुम्हाला ऑनलाईन ट्रेडिंगमध्ये जास्त फायदा करून देवू, असे सांगत 10 मे 2024 ते 06 जून 2024 या दरम्यान वेळोवेळी त्यांच्याकडून ऑनलाइन स्वरूपात 26 लाख 74 हजार रुपयाची रक्कम घेतली आणि ती परत न करता त्याची फसवणूक केली. आपली फसवणूक झाली हे निदर्शनास आल्यानंतर चेतन नेहेते याने थेट जळगाव येथील सायबर पोलीस ठाणे गाठले आणि सोशल नेटवर्क वरील दीपक राज व लेझर्ड एव्हीलीन आयडी ओळख असलेल्या दोन अज्ञात व्यक्तीविरुद्ध फसवणुकीचा गुन्हा दाखल करण्यात आला. तपास पोलीस निरीक्षक दत्तात्रय निकम करीत आहेत.
