Interstate chain snatching gang busted ; vehicle theft cases also exposed नागपूर (15 जुलै 2025) : सराईत गुन्हेगारांच्या टोळीला नागपूरातील गुन्हे शाखा युनिट दोनने अट केली आहे. आरोपी हे
आंतरराज्यीय टोळीतील सदस्य असून त्यांनी नागपुरात चेन स्नॅचिंगचे सहा व वाहन चोरीचे चार गुन्हे केले असल्याचे उघड झाले आहे.
अक्षय विष्णुदत्त शर्मा (29, रा.पूर्व सागरपूर), रोहितकुमार सुरेश कुमार (27, द्वारका, सेक्टर 1) आणि रोहित पशुपतीनाथ गुप्ता (27, सागरपूर, दिल्ली) अशी आरोपींची नावे आहेत. त्याचा साथीदार रोहन टिके पसार आहे. सर्व आरोपी हे सराईत गुन्हेगार आहेत.
रोहन हा वर्ध्याचा रहिवासी आहे. तो दिल्लीत स्थायीक झाला आहे. तो पूर्वी अक्षयसोबत एका खाजगी कंपनीत काम करायचा. अक्षयवर दरोडा आणि चोरीसह 20 हून अधिक गुन्हे दाखल आहेत. तो बर्याच काळापासून गुन्हेगारीत सक्रिय आहे. रोहनने अक्षय आणि रोहित कुमारला नागपूरमध्ये दागिने घालणार्या भरपूर महिला सापडतील असे सांगितले. यानंतर आरोपींनी नागपुरात गुन्हा करण्याचा कट रचला.
ते दिल्लीहून रेल्वेने नागपूरला यायचे. त्यानंतर ते अगोदर मोटारसायकल चोरायचे व त्यावरून चैन स्नॅचिंग करायचे. नंतर, ते मोटारसायकल तिथेच सोडून रेल्वेने दिल्लीला परतायचे. धंतोली पोलिस ठाण्यात दाखल झालेल्या चेन स्नॅचिंगच्या गुन्ह्यात सीसीटीव्ही फुटेज तपासत असताना पोलिस रेल्वे स्थानकावर पोहोचले. आरोपी तेलंगणा एक्सप्रेसने गेल्याची बाब समोर आली.
पोलिसांनी नागपूर, इटारसी, भोपाळ, झाशी, ग्वाल्हेर, आग्रा आणि दिल्ली येथील स्थानकांचे सीसीटीव्ही फुटेज तपासले. दिल्ली स्टेशनबाहेरील सीसीटीव्हीवरून आरोपी ज्या ऑटो रिक्षातून आले होता त्याच्या माध्यमातून शोध घेण्यात आला. आधारावर अक्षय आणि रोहितला पकडण्यात आले. त्यांनी गुप्ताला चोरीचे दागिने विकल्याबद्दल सांगितले. पोलिसांनी गुप्ता यालाही ताब्यात घेतले. त्याच्याकडून 75 ग्रॅम सोन्याचे दागिने जप्त करण्यात आले आहेत.
आरोपींनी नागपूरसह अनेक शहरांमध्ये गुन्हे केले आहेत. ही कारवाई डीसीपी राहुल माकणीकर यांच्या मार्गदर्शनाखाली पोलीस निरीक्षक महेश सांगळे आणि त्यांच्या पथकाने केली.
आरोपींनी धंतोली, सदर पोलीस ठाण्याच्या हद्दीतून प्रत्येकी दोन, तर बुटीबोरी व अजनी पोलीस ठाण्याच्या हद्दीतून प्रत्येकी एक चेन स्नॅचिंग केली तर सीताबर्डी व धंतोली पोलिस ठाण्याच्या हद्दीतून प्रत्येकी दोन मोटारसायकल लंपास केल्या होत्या.
