जळगावात भीषण अपघात : नशिराबादच्या प्रौढाचा मृत्यू
जळगावातील दूरदर्शन टॉवर समोर अपघात ; ट्रकसह चालक ताब्यात
Fatal accident in Jalgaon: Adult from Nashirabad dies जळगाव (27 जुलै 2025) : शहरात अपघाताची मालिका कायम आहे. राष्ट्रीय महामार्गावरील दूरदर्शन टॉवर समोर कामावरुन घरी जात असलेल्या प्रौढाच्या दुचाकीला मागून भरधाव ट्रकने चिरडल्याचा प्रकार शुक्रवार, 25 रोजी रात्री साडेआठ वाजता घडला. पोलिसांनी ट्रकसह चालकाला ताब्यात घेतले असून त्याच्याविरुद्ध एमआयडीसी पोलीस स्टेशन येथे गुन्हा दाखल करण्यात आला. शेख हारुन शेख रशीद मणियार (44, रा.मणियार मोहल्ला नशिराबाद, ता. जळगाव) असे मृताचे नाव आहे.
काय घडले जळगावात
शेख हारुन शेख रशिद मणियार हे जळगाव शहरातील नवीपेठेतील सायकल मार्टच्या दुकानावर कामाला होते. दररोज ते नशिराबाद येथून (एम.एच.19 सी.क्यू.9758) क्रमांकाच्या दुचाकीने कामावर येत होते. शुक्रवारी सकाळी नेहमीप्रमाणे कामावरुन आले आणि काम आटोपून ते सायंकाळी घराकडे दुचाकीवरून घरी जाण्यासाठी निघाले. यावेळी त्यांना जळगावकडून भुसावळकडे (सीजी 07, बीए 5053) क्रमांकाच्या भरधाव वेगाने जाणार्या ट्रकने जोरदार धडक देत चिरडले. शेख हारुन हे ट्रकच्या चाकाखाली आल्याने त्यांच्या चेहर्याचा चेंदामेंदा झाला.
ट्रक चालकाविरोधात गुन्हा
त्यांच्या पश्चात आई, पत्नी, दोन मुले आणि मुलगी असा परिवार आहे. अपघाताची माहिती मिळताच एमआयडीसी पोलिसांनी घटनास्थळी धाव घेतली. त्यानंतर मृतदेह तात्काळ शासकीय वैद्यकीय महाविद्यालय व रुग्णालयात दाखल केला. याठिकाणी वैद्यकीय अधिकार्यांनी तपासणी करीत मयत घोषीत केले. पोलिसांनी दुचाकीस्वाराला चिरडणार्या ट्रकसह चालकाला ताब्यात घेतले. ट्रक देखील पोलीस ठाण्यात जमा करण्यात आला.
