यावल पोलिसांनी दरोड्याचा डाव उधळला : मध्यप्रदेशातील कुविख्यात दरोडेखोर जाळ्यात
Yaval police foil robbery plot : Notorious robber from Madhya Pradesh caught यावल (6 ऑगस्ट 2025) : यावल-चोपडा रस्त्यावर एका विना क्रमांकाची इर्टीका कारमध्ये दरोडा टाकण्याच्या उद्देशातून पाच संशयित थांबलेले असतानाच यावल पोलिसांनी डाव उधळत चौघांना बेड्या ठोकल्या तर एक संशयीत पसार झाला. पोलिसांनी वाहन व दरोडा टाकण्यासाठी त्यांच्याकडे असलेले साहित्य हस्तगत केले व यावल पोलीस ठाण्यात गुन्हा दाखल करण्यात आला. आरोपी मध्यप्रदेशातील रहिवासी आहेत.
काय आहे नेमके प्रकरण
चोपडा रस्त्यावर किनगावकडून यावलकडे मंगळवारी मध्यरात्रीनंतर एक संशयित वाहन येत असल्याची गोपनीय माहिती पोलीस निरीक्षक रंगनाथ धारबळे यांना मिळाली होती. त्यांनी तातडीने सहायक पोलीस निरीक्षक अजयकुमार वाढवे, पोलीस उपनिरीक्षक अनिल महाजन, पोलीस हवालदार सुनील पाटील, वसीम तडवी, अनिल साळुंखे, सचिन पाटील, मंगेश पाटील, ज्ञानेश्वर सपकाळे या पथकास पडताळणी करीत पाठवले. पथक मध्यरात्री दोन वाजेच्या सुमारास चोपडा रस्त्यावर निघाले.
दरम्यान विरावली फाट्याच्या पुढे अंधारात विना क्रमांकाची इरटीका कार रस्त्याच्या कोपर्यात लावलेली त्यांना दिसली तर एक जण रस्त्यावर पाळत ठेवुन असल्याचे दिसुन आले. पोलिस कारच्या दिशेने जात असतांना कार पळवण्याचा प्रयत्न चालकाने केला तर पाळत ठेवणार्यास पकडण्यास पोलिस गेले असता तो अंधाराचा फायदा घेत पसार झाला.
या आरोपींना अटक
पोलिसांनी कारमध्ये हातात हत्यार तोंडावर काळ्या रंगाचा मास्क लावलेल्या सोहेल मकसूद खान (27, रा.खजराना इंदोर, मध्यप्रदेश), परवेज अब्दुल गनी (35, रा.चंदन नगर इंदोर, मध्य प्रदेश), इमरान अली शहजाद अली शाह (36, रा.खजराना इंदोर, मध्यप्रदेश) व मोहम्मद वसीम मोहम्मद रशीद (34, रा.सरवटे रोड, इंदोर मध्य प्रदेश) यांना अटक करण्यात आली.
चौघांविरुद्ध यावल पोलीस ठाण्यात सहायक पोलीस निरीक्षक अजयकुमार वाढवे यांच्या फिर्यादीवरून गुन्हा दाखल करण्यात आला. तपास पोलीस उपनिरीक्षक अनिल महाजन करीत आहे.
