नितीन गडकरींनी टोचले भाजप नेत्यांचे कान ; जुन्या कार्यकर्त्यांना डावलल्यास परिणाम गंभीर !

राज्यात आगामी स्थानिक स्वराज्य संस्थांच्या निवडणुका जवळ येत असल्याने सर्वच राजकीय पक्षांमध्ये हालचालींना वेग आला आहे. भाजपमध्ये नव्या नेत्यांच्या प्रवेशाचा ओघ वाढत असताना, पक्षातील वरिष्ठ नेते गडकरी यांनी यावर रोखठोक प्रतिक्रिया दिली आहे.

नागपूर जिल्ह्यातील कळमेश्वर येथे विकासकामांच्या भूमिपूजन कार्यक्रमात बोलताना गडकरी म्हणाले की, भाजपमध्ये सध्या मोठ्या प्रमाणात नवीन लोकांचा ओघ आहे. हे चांगलं आहे, पण ज्यांनी पक्ष उभा केला, कठीण काळात काम केलं, त्यांना विसरून चालणार नाही. यावेळी मंचावर महसूल मंत्री चंद्रशेखर बावनकुळे उपस्थित होते. गडकरी यांनी त्यांच्याकडे पाहत म्हटले की, बावनकुळे, जुन्या कार्यकर्त्यांकडे लक्ष द्या. तेच आपल्या पक्षाचं खरं बळ आहेत. निष्ठावंत कार्यकर्ते जर नाराज झाले तर पक्ष कितीही मोठा झाला तरी एका दिवसात खाली येऊ शकतो. त्यांच्या या वक्तव्याने उपस्थितांमध्ये एकच कुजबुज सुरू झाली.

घरची मुर्गी दाल बराबर
या कार्यक्रमात गडकरी यांनी आपली खास नागपुरी शैली वापरत कार्यकर्त्यांना समजावलं. घरची मुर्गी दाल बराबर आणि बाहेरचं सावजी चिकन मसाला असं काहीतरी झालंय, असं म्हणत त्यांनी पक्षातील वातावरणाचं अचूक वर्णन केलं. त्यांनी डॉ. राजीव पोतदार यांचा उल्लेख करत सांगितलं की, तो प्रामाणिक, निष्ठावंत आणि जनतेशी जोडलेला कार्यकर्ता आहे. त्याने आपलं वैद्यकीय काम बाजूला ठेवलं आणि लोकांसाठी रात्रंदिवस फिरत राहिला. अशा लोकांकडे दुर्लक्ष करणं म्हणजे पक्षाचं नुकसान करणे. गडकरींनी बावनकुळे यांना थेट उद्देशून म्हटले की, डॉ.पोतदारसारख्या कार्यकर्त्यांना प्रोत्साहन दिलं नाही, तर पुढे अडचणी निर्माण होतील.

भाजपमधील अनेक नेत्यांचे कान टोचले
गडकरींनी स्पष्टपणे सांगितलं की, राजकारणात निष्ठा, काम आणि जनतेशी असलेला संवाद हाच खरा पाया आहे. निवडणुका फक्त पैसा आणि प्रतिष्ठेच्या जोरावर जिंकल्या जात नाहीत. जुने कार्यकर्ते हेच पक्षाचं बळ आहेत. त्यांना विसरू नका, नाहीतर जेवढ्या वेगाने वर चढाल, तेवढ्याच वेगाने खालीही याल. त्यांच्या या थेट आणि स्पष्ट शब्दांनी भाजपमधील अनेक नेत्यांचे कान टोचले गेले आहेत. गडकरींच्या वक्तव्यामुळे पक्षाच्या धोरणांवर आणि आगामी निवडणुकांतील उमेदवारीच्या समीकरणांवर नक्कीच परिणाम होणार असल्याचे राजकीय निरीक्षकांचे मत आहे.